Íslenskar stjörnur sáu um að kynna tilnefningar evrópsku stjarnanna

Kolbeinn Tumi Daðason skrifar 9. nóvember 2022 15:57

Benedikt Erlingsson, Halldóra Geirharðsdóttir, Baltasar Kormákur og Ólafur Arnalds eru meðal þeirra Íslendinga sem komu að gerð myndbandsins þar sem tilnefningar til verðlaunanna voru kynntar.

Íslenskir leikarar og tónlistarfólk eru í aðalhlutverkum í myndbandi þar sem kynnt er hver eru tilnefnd í aðalflokkum Evrópsku kvikmyndaverðlaunanna í ár. Hátíðin fer sem kunnugt er fram í Hörpu þann 10. desember.

Evrópska kvikmyndaakademían upplýsti um tilnefningarnar með birtingu myndbandsins. Hátíðin fer fram annað hvert ár í Berlín en þess á milli í öðrum borgum Evrópu. Nú er komið að Reykjavík.

Þetta er í 35. skipti sem kvikmyndaverðlaunin eru haldin og af því tilefni var ákveðið í fyrsta sinn að kynna tilnefningar með myndbandi. Framleiðslan var unnin í samstarfi Evrópsku kvikmyndaakademíunnar og Íslandsstofu.

Klippa: Tilnefningar til Evrópsku kvikmyndaverðlaunanna

Arnar Helgi Atlondres leikstýrði myndbandinu og Atli Örvarsson samdi tónlist. Fram koma Halldóra Geirharðsdóttir, Margrét Einarsdóttir, Benedikt Erlingsson, Ólafur Arnalds og Baltasar Kormákur.

Stjörnurnar mæta til Reykjavíkur

Margir þekktir leikstjórarar og leikarar munu sækja landið heim þegar verðlaunaafhendingin fer fram í desember. Má þar nefna spænsku leikkonuna Penélope Cruz sem er tilnefnd sem besta leikkonan fyrir Parallel Mothers og breska leikarann Kenneth Branagh sem er tilnefndur fyrir besta handritið fyrir Belfast. Einnig sænska leikstjórinn Ruben Östlund, sem fékk tilnefningar fyrir bestu evrópsku kvikmyndina, besta leikstjórann og besta handritið fyrir Triangle of Sadness.

Penelope Cruz er meðal tilnefndra sem munu væntanlega leggja leið sína til landsins. Hér er hún í hlutverki sínu í Paralell Mothers.

Volaða land með tilnefningu

Þá er danski leikarinn Elliott Crosset Hove tilnefndur sem besti evrópski leikarinn fyrir leik sinn í kvikmyndinni Godland, eða Volaða land, eftir íslenska leikstjórann Hlyn Pálmason. Myndin fjallar um danskan prest sem ferðast til Íslands í lok 19. aldar með það að markmiði að reisa kirkju og ljósmynda íbúa eyjunnar á för sinni. Ingvar E. Sigurðsson fer einnig með stórt hlutverk í myndinni.

Fram hefur komið að Leynilöggan, í leikstjórn Hannesar Þórs Halldórssonar, er tilefnd í flokki gamanmynda á hátíðinni fyrst íslenskra kvikmynda.

Nóvember er tileinkaður evrópskri kvikmyndagerð en allar kvikmyndirnar sem eru tilnefndar sem besta kvikmynd til Evrópsku kvikmyndaverðlaunanna verða sýndar í Bíó Paradís.

Einnig verða sérstakar spurt og svarað sýningar með heiðursverðlaunahöfum, ásamt fjölda sérviðburða í Bíó Paradís. Sýningarnar munu fara fram aðdraganda verðlaunanna. Hægt er að kynna sér dagskrána á bioparadis.is.

Klippa: Volaða land - sýnishorn

Tilnefningar eru eftirfarandi:

Besta evrópska kvikmyndin

ALCARRÀS, leikstjóri Carla Simón, framleidd af María Zamora, Stefan Schmitz, Tono Folguera og Giovanni Pompili. (Spánn/Ítalía)

CLOSE, leikstjóri Lukas Dhont, framleidd af Michiel Dhont, Dirk Impens, Michel Saint-Jean, Laurette Schillings, Arnold Heslenfeld, Frans van Gestel og Jacques-Henri Bronckart (Belgía/Frakkaland/Holland)

CORSAGE, leikstjóri Marie Kreutzer, framleidd af Alexander Glehr, Johanna Scherz, Bernard Michaux, Jonas Dornbach, Janine Jackowski, Maren Ade & Jean-Christophe Reymond(Austurríki/ Luxemburg/ Þýskaland/Frakkland)

HOLY SPIDER, leikstjóri Ali Abbasi, framleidd af Sol Bondy & Jacob Jarek (Danmörk/Þýskaland/ Svíþjóð/ Frakkland)

TRIANGLE OF SADNESS, leikstjóri Ruben Östlund, framleidd af Erik Hemmendorff & Philippe Bober (Svíþjóð/ Þýskaland/ Frakkland/ Bretland)

Besta evrópska heimildamyndin

A HOUSE MADE OF SPLINTERS, leikstjóri Simon Lereng Wilmont (Danmörk/ Svíþjóð/ Finnland/ Úkraína)
GIRL GANG, leikstjóri Susanne Regina Meures (Sviss)
MARIUPOLIS 2, leikstjóri Mantas Kvedaravičius (Litháen/ Frakkland/ Þýskaland)
THE BALCONY MOVIE, leikstjóri Paweł Łoziński (Pólland)
THE MARCH ON ROME, leikstjóri Mark Cousins (Ítalía)

Besti evrópski leikstjórinn

Lukas Dhont fyrir CLOSE
Marie Kreutzer fyrir CORSAGE
Jerzy Skolimowski fyrir EO
Ali Abbasi fyrir HOLY SPIDER
Alice Diop fyrir SAINT OMER
Ruben Östlund fyrir TRIANGLE OF SADNESS

Besta evrópska leikkonan

Vicky Krieps fyrir CORSAGE
Zar Amir Ebrahimi fyrir HOLY SPIDER
Léa Seydoux fyrir ONE FINE MORNING
Penélope Cruz fyrir PARALLEL MOTHERS
Meltem Kaptan fyrir RABIYE KURNAZ VS. GEORGE W. BUSH

Besti evrópski leikarinn

Paul Mescal fyrir AFTERSUN
Eden Dambrine fyrir CLOSE
Elliott Crosset Hove fyrir GODLAND
Pierfrancesco Favino fyrir NOSTALGIA
Zlatko Burić fyrir TRIANGLE OF SADNESS

Besta evrópska handritið

Carla Simón og Arnau Vilaró fyrir ALCARRÀS
Kenneth Branagh fyrir BELFAST
Lukas Dhont og Angelo Tijssens fyrir CLOSE
Ali Abbasi og Afshin Kamran Bahrami fyrir HOLY SPIDER
Ruben Östlund fyrir TRIANGLE OF SADNESS

Evrópska kvikmyndaakademían leitast við að styðja og tengja saman 4.400 meðlimi sína ásamt því að kynna verk þeirra. Markmiðið er að miðla þekkingu og fræða áhorfendur á öllum aldri um evrópska kvikmyndagerð.

Kvikmyndagerð á Íslandi Menning

Tengdar fréttir

Leynilögga tilnefnd til Evrópsku kvikmyndaverðlaunanna

Evrópsku kvikmyndaverðlaunin voru rétt í þessu að tilkynna um tilnefningar í flokki gamanmynda og er íslenska kvikmyndin Leynilögga þar tilnefnd. Áður hafði komið fram að Berdreymi og Volaða land eru í forvali í kvikmyndaflokki.

19. október 2022 10:17