Elskar að henda sér út í djúpu laugina

Margt flott og fullt af mistökum

Aðspurður hvað einkenni hann mest sem listamann segir Halldór:

„Ég elska að henda mér út í djúpu laugina. Mér finnst svo gaman að læra nýja hluti svo verkin mín byggja oftar en ekki á því að ég kynni mér svo sem eins og eina nýja iðngrein í hvert skipti sem ég bý til nýtt konsept.

Þetta er hugarfar sem ég hef alltaf búið yfir og mín bestu augnablik í listsköpun eru þegar ég er í uppfinningafasanum. 

Að prófa mig hægt og rólega áfram, þreifa um í myrkrinu og reka mig á hluti. Oft verður eitthvað mjög flott til úr því en auðvitað gerir maður líka fullt af mistökum.“

Náttúran í gegnum auga stærðfræðinnar

Foreldrar Halldórs virðast hafa haft mótandi áhrif á sköpunargleði hans.

„Pabbi gaf mér fyrstu tölvuna mína þegar ég var fimm ára, það var gamla Macintosh Plus tölvan hans. Í henni gat ég teiknað svarthvítar myndir og prentað út á gamlan nálaprentara. 

Mamma er veðurfræðingur og hefur kennt mér margt um hvernig hægt er að fylgjast með náttúrunni í gegnum auga stærðfræðinnar. Allt í kringum okkur er hægt að herma með flóknum stærðfræðijöfnum.“

Halldór lærði svo forritun í háskólanum.

„Þar kynntist ég alls konar aðferðum við að búa til falleg mynstur með hjálp stærðfræði og forritunar. Eitt af þeim mynstrum er það sem ég byggi myndirnar mínar á. Þannig að þessi samruni náttúrunnar og tækninnar er kannski mitt meginviðfangsefni og ég hef haldið mig mest í plönturíkinu hingað til. 

Mér finnst gaman hvernig er hægt að draga fram sál og karakter út úr tölvugerðum plöntumyndum.“

Tilviljanatré og blek úr íslenskum krækiberjum

Á sýningunni má finna safn hluta sem Halldór Eldjárn hefur unnið út frá sjálfsprettandi teikningum af ímynduðu plöntunni Herba Stochia eða Tilviljanatrénu en hann notast við einstakar leiðir í listsköpun sinni.

„Tilviljanatréð er mín tilraun til þess að gera lífræna mynd með ólífrænum aðferðum. Aðferðin er tölvustýrður teikniarmur sem heldur á japönskum skrautskriftarpenna. 

Myndin í tölvunni er miklu harðari og línukenndari en það sem endar á blaðinu og er það að hluta til pennanum að þakka en líka blekinu sem ég nota, sem ég bý til sjálfur úr íslenskum krækiberjum.

Það er misþykkt og fer eftir því hvernig ég sýð það hvort það sé þykkt eða þunnt, hvernig það rennur til og sest svo í pappírinn. 

Engar tvær myndir eru eins, ég keyri forritið alltaf frá grunni áður en ég teikna hverja einustu mynd. Þessar myndir hafa verið í sölu hjá mér síðustu tvö ár, en þegar það koma ný krækiber þá fer ég venjulega og geri nýja seríu. Þetta er svona árstíðabundin list og selst alltaf allt upp,“ segir Halldór.

Plöntumynstur á kvittanapappír

Annað verk sem verður til sýnis er Plöntuprentarinn, sem er vél sem hangir uppi á vegg og prentar út plöntumynstur á kvittanapappír.

„Ég var að gera alls konar tilraunir með skynjara, meðal annars ljósnema sem segir manni hversu mikil birta er í rými. Mér datt í hug að það væri hægt að nota hann til að láta vélar bregðast við umhverfinu sínu. 

Eitt af því fyrsta sem ég byggði var taktmælir sem var hægt að stjórna með handahreyfingum, með því að sveifla höndinni taktvisst og búa til skugga á ljósnemann.“

Eftir að Halldór rakst á gamlan kvittaraprentara tók nostalgían við.

„Ég fór að rifja upp Macintosh Plus dagana mína sem krakki, hvað það var ótrúlega gaman að teikna alls konar myndir í svarthvítu og sjá þær prentast út. Ég held það sé bara eitt það skemmtilegasta sem ég geri, að prenta út. 

Ég tengdi því gamlan kvittanaprentara við ljósnemann og bjó til smá kóða sem reiknar út plöntumynstur og úr varð Plöntuprentarinn.“

Plöntuprentarinn virkar þannig að hann prentar virkilega hægt, örfáa millimetra á klukkutíma en er alltaf að vinna í stórri mynd. 

Áður en hann prentar hvert skref þá mælir hann ljósið og tekur alls konar ákvarðanir um hvort að hann ætli að bæta laufblöðum á plöntuna sem hann prentar. Það hefur einnig áhrif á hversu stór laufblöðin eru.

„Þannig að ef hann er látinn ganga í nokkra daga þá sér maður hvernig plantan dafnar í birtu og dregst saman á nóttunni. Prentarinn skrásetur þannig sólarganginn og tímann. Mér finnst gott að hafa hann í gangi og skoða hann reglulega yfir daginn, maður fær betri tilfinningu fyrir hvernig tíminn lekur áfram.“

Treflar úr tölvustýrðum vefstól

Halldór segir sýninguna hafa verið í vinnslu síðustu mánuði en þetta er þriðja sýning hans með Plöntuprenturum og Tilviljanatrjám.

„Í þetta skiptið er ég líka með nýja trefla til sýnis, en þeir eru búnir til í tölvustýrðum vefstól og á þeim er sama mynstur og Plöntuprentararnir búa til. 

Ferlið hefur gengið vel, ég er farinn að þekkja það nokkuð vel, en þó ég noti græjur til að teikna þá er alltaf talsverð vinna fólgin í að gera blekið, fylla á pennana, sjá til þess að ekkert brenni yfir eða vélarnar gangi úr böndunum. 

Ég uppfærði líka alla kóðana svo að plönturnar eru aðeins öðruvísi en síðast, mér finnst skemmtilegt ef forritunarkóðinn minn er að breytast milli sýninga. Það getur svo vel verið að eitt og annað nýtt leynist á sýningunni.“

Opnunarhófið fer sem áður segir fram í STAK að Hverfisgötu 31 á morgun og verður á milli klukkan 17:00 og 19:00. Sýningin verður opin áfram yfir helgina, á milli klukkan 13:00-17:00 á föstudag og laugardag

„Ég er bara gríðarlega spenntur að sýna þessa sýningu og vona að öll sem hafa áhuga geti gert sér ferð á sýninguna. Annars má líka alltaf hafa samband við mig beint ef að fólk langar að skoða utan sýningartíma eða bara spjalla eða spyrja út í verkin,“ segir Halldór að lokum.