Mesta jóla­barn landsins á sex­tíu kassa af jóla­skrauti

Heimili Vilbergs Guðnasonar og konu hans lætur kannski ekki mikið fyrir sér fara að utanverðu, en þegar komið er inn fyrir blasir við ævintýraveröld. Við heimsóttum hjónin fyrir kvöldfréttatíma Stöðvar 2 og mælum með að horfa á fréttina til að fá innblástur af jólaskreytingum.

Jólaskraut þeirra hjóna fyllir hvorki meira né minn en sextíu stóra kassa og neyddist Vilberg til að smíða sérstakan skúr úti í garði til að geyma það. Tilkomumikið jólaþorp á þremur hæðum tekur næstum hálfa stofuna. Það vita allir sem þekkja Vilberg hversu mikið jólabarn hann er.

„Ójá, það er ég. Ég á mikið af jólaskrauti og þarf að skipta út á milli ára. Ég skipti öllu út í eldhúsinu og já, það eru öll herbergi skreytt.“

Smitaði konuna af áhuga

Konan hans Vilbergs kemur frá Þýskalandi. Þegar þau kynntust var hún ekki alveg jafn hrifin af öllu þessu skrauti og hann, en honum tókst á endanum að smita hana af áhuganum.

„Stuttu eftir að við kynntumst bað hún mig að taka þetta allt niður. Henni fannst þetta of mikið, en í dag er hún mjög sátt.“

En þó Vilberg hafi mikið fyrir því að setja allt skrautið upp er hann búinn að koma því þannig fyrir að þessu fylgi ekkert vesen.

„Allt dótið sem er í rafmagni er allt á tímastilli. Það kviknar á því á ákveðnum tíma og slökknar á ákveðnum tíma. Það er alltaf ljós í þorpinu á kvöldin. Ég þarf ekkert að hlaupa um allt hús og slökkva. Þannig að ég bara nýt þess að horfa á þetta,“ segir Vilberg Guðnason, jólabarn með meiru.