Sakar Helga í Góu um ítrekaða kynferðislega áreitni

Katrín Lóa er til viðtals í hlaðvarpsþættinum Eigin konum á vef Stundarinnar. Katrín Lóa stígur fram í þættinum og segist hafa orðið fyrir kynferðislegu áreiti af hálfu Helga í kjölfar þess að Helgi lánaði henni fé til útborgunar í íbúð.

Helgi er einn af stærri atvinnurekendum landsins en hann rekur Sælgætisgerðina Góu í Garðabæ og einnig KFC veitingastaðakeðjuna.

Í umfjöllun Stundarinnar kemur fram að upphaf málsins megi rekja til þess að árið 2018 starfaði Katrín Lóa í Skalla á Selfossi, sjoppu sem er í eigu Helga. Segist hún hafa heyrt af því á sínum tíma að starfsfólk fyrirtækja í eigu Helga ætti kost á lánafyrirgreiðslu vegna íbúðakaupa.

Í kjölfarið hafi Helgi boðist til að lána henni fjármuni svo hún gæti keypt sér íbúð. Fjármunirnir komu þó ekki í gegnum fyrirtækið, heldur lánaði Helgi henni persónulega. Upphæðin nam rúmum fimm milljónum króna.

Katrín Lóa ræddi málið einnig í samtali við Gústa B. í Veislunni í dag.

Segist hafa upplifað sig fasta í starfinu

Í viðtalinu segir Katrín Lóa að vikuna eftir að hún fékk fyrri greiðsluna af tveimur hafi Helgi brotið á henni kynferðislega í fyrsta sinn þar sem hún var stödd á skrifstofu fyrirtækisins. Segir hún Helga hafa farið inn á bolinn hennar og lyft honum upp. 

Segist hún hafa rætt við verslunarstjóra Skalla, Helga Helgason í kjölfar þessa atviks, og verið lofað að rætt yrði við Helga. Það hafi hins vegar ekki verið gert.

Þá segir Katrín Lóa að Helgi hafi áreitt sig reglulega eftir þetta. Hún hafi upplifað að hún væri föst í starfinu þar sem hún var nýbúin að þiggja fyrrnefnt lán frá Helga. 

Að neðan má sjá brot úr þættinum Eigin konum.

Lítið um viðbrögð

Katrín Lóa segist á endanum hafa skilað inn uppsagnarbréfi til Helga Helgasonar verslunarstjóra þar sem hún sagðist ætla að greina stjórn fyrirtækisins frá áreiti Helga. Segir hún Helga hafa sagst ætla að fara sjálfur á slíkan fund. Katrín Lóa segist ekki vita hvort sá fundur hafi átt sér stað.

Katrín Lóa segist einnig hafa fundað með mannauðstjóra KFC og í kjölfarið með hluta stjórnar fyrirtækisins. Hennar upplifun var sú að lítið var gert úr áreitinu sem hún sagðist hafa orðið fyrir. Hins vegar var henni gert að skrifa undir samning um það hvernig hún myndi greiða lánið til baka.

Þá segist Katrín einnig hafa leitað til lögreglu vegna málsins en fengið þau svör að að hún þyrfti helst að geta lagt fram myndband af áreitinu sem sönnun. Hún lagði ekki fram kæru.

Þá segir Katrín Lóa að hún hafi loksins hætt hjá fyrirtækinu í kjölfar þess að henni bauðst ný vinna og greiddi lánið frá Helga inn á reikning fyrirtækisins.

Á öðrum stað í viðtalinu lýsir Katrín líðan sinni vegna áreitisins. Hún hafi orðið kvíðin, þunglynd og glímt við sjálfsvígshugsanir.

„Alltaf þegar ég kom heim á kvöldin þá brotnaði ég niður. Grét mig í svefn þegar ég náði að sofa.“

Sér eftir samskiptunum

Vísir hefur ekki náð tali af Helga Vilhjálmssyni vegna málsins. Í stuttri skriflegri yfirlýsingu til Stundarinnar biður hann Katrínu Lóu afsökunar.

„Ég vil biðja Katrínu Lóu afsökunar. Ég gerði mistök í þessum samskiptum og sé eftir því.“

Umfjöllun Stundarinnar í heild sinni.