Manchester borg er rauð eftir magnaða endurkomu

Orrustan um Manchester borg stóð undir væntinum á Old Trafford í dag þegar Man Utd fékk Man City í heimsókn í stórleik dagsins í ensku úrvalsdeildinni.

Manchester City niðurlægði nágranna sína í fyrri viðureign liðanna á Etihad leikvangnum í fyrri viðureign liðanna á tímabilinu en frá þeim leik hefur frammistaða Man Utd stórbatnað með hverjum leiknum og því gerðu stuðningsmenn liðsins sér vonir um að hefna fyrir stórtapið.

Ekkert mark var skorað í fyrri hálfleik en bláliðar voru meira með boltann á meðan rauðklæddir heimamenn fengu betri færi en Marcus Rashford fékk tvö góð færi til að koma Man Utd í forystu en tókst ekki að koma boltanum í netið.

Man City hafði meiri yfirburði í síðari hálfleik og því verðskuldað þegar gestirnir náðu forystu með marki varamannsins Jack Grealish á 60.mínútu.

Það var fátt sem benti til þess að heimamenn ættu leið til baka eða allt þar til Bruno Fernandes slapp í gegn á 78.mínútu og kláraði færið sitt snyrtilega framhjá Ederson. Flaggið hjá aðstoðardómaranum fór á loft þar sem Rashford var klárlega rangstæðu. Hann snerti hins vegar aldrei boltann og fékk markið að standa þrátt fyrir kröftug mótmæli gestanna.

Nokkrum andartökum síðar náði Man Utd forystunni þegar Rashford var réttur maður á réttum stað fyrir heimamenn og skoraði eftir undirbúning Alejandro Garnacho.

Staðan skyndilega orðin 2-1 fyrir Man Utd og lítið eftir af leiknum. Lærisveinum Pep Guardiola tókst ekki að finna leið framhjá þéttum varnarmúr heimamanna á lokakafla leiksins og endurkomusigur Man Utd staðreynd.