Tuttugu­faldi Ís­lands­meistarinn Guð­mundur snýr aftur eftir ára­tugs pásu

„Hann varð Íslandsmeistari 11 ára,“ sagði Sverrir Þór Sverrisson, Sveppi, í þætti dagsins. Guðmundur var svo áfram Íslandsmeistari í einliðaleik í borðtennis næstu tvo áratugina eða allt þangað til spaðinn fór á hilluna.

Guðmundur varð síðast Íslandsmeistari árið 2013. Ásamt titlunum tuttugu þá keppti hann sem atvinnumaður í Danmörku, Svíþjóð og Hollandi. Eftir að leggja spaðann á hilluna þá hefur hann ekki keppt í borðtennis og vart komið við spaða, það er þangað til nýlega.

Hringt var í Guðmund í þætti dagsins og þar staðfesti Íslandsmeistarinn fyrrverandi að hann myndi taka þátt á nýjan leik. Íslandsmótið í borðtennis fer fram fyrstu helgina í mars. Hér að neðan má hlusta á brotið úr þættinum þar sem hringt var í Guðmund og hann staðfesti tíðindin.