„Ríkis­sátta­semjari að reyna að auka vald­heimildir sínar“

Sólveig Anna Jónsdóttir formaður Eflingar óskaði í gær eftir fundi með Guðmundi Inga Guðbrandssyni vinnumarkaðsráðherra vegna útspils ríkissáttasemjara í kjaradeilu Eflingar og SA. Rikissáttasemjari hefur lagt fram miðlunartillögu, sem samninganefnd Eflingar hefur hafnað en ríkissáttasemjari vill leggja tillöguna fyrir Eflingarliða. Hann óskaði á föstudag eftir liðsinni héraðsdóms með að fá kjörskrá Eflingar afhenta, en stjórn Eflingar hefur neitað að afhenda hana.

Sólveig Anna skrifar í pistli á Facebook sem hún birti í gærkvöldi að vegna útspils ríkissáttasemjara sé traust verkalýðsfélaga á honum skert og segir hún framferði hans óþolandi.

„Við teljum að það sé ekki búið að fullreyna allar leiðir sem eru til staðar fyrir samningsaðila til að ná kjarasamningi og viljum skora á ríkissáttasemjara að draga þessa meintu miðlunartillögu til baka og gefa félaginu færi á að semja við viðsemjanda sinn,“ segir Kristján Þórður Snæbjarnarson, formaður Rafiðnaðarsambandsins.

Atkvæðagreiðsla um miðlunartillögu vonlaus í fjölmennu félagi

Öll stærstu stéttarfélög landsins hafa gagnrýnt úspil ríkissáttasemjara og þingmenn sömuleiðis. Jóhann Páll Jóhannsson þingmaður Samfylkingarinnar sagði í gær að atkvæðagreiðsla ríkissáttasemjara væri skrumskæling á lýðræði. Kristján Þórður tekur undir það sjónarmið. 

„Atkvæðagreiðsla um miðlunartillögu, í svona stórum hópi, er þannig að stór hluti atkvæða þarf að falla gegn tillögunni til að geta fellt hana. Í svona fjölmennu félagi getur það reynst vonlaust. Það er það sem er mjög slæmt í þessu. Þetta er minna atriði þegar við erum með fámenna hópa. Þetta er verulega slæm leið til að fara.“

Alþingi þurfi að endurskoða ákvæði í lögum um miðlunartillögur. 

„Þetta hefur ekki reynst vera vandamál hingað til á almennum markaði, þar sem miðlunartillögur hafa ekki verið lagðar fram nema samningsaðilar séu sáttir um að það verði gert. Ríkissáttasemjarar hafa alltaf leitað samþykkis samningsaðila. Nú er breyting þar á sem ég tel gríðarlega slæma þróun,“ segir Kristján. 

„Ég held að það þurfi að stíga skref til baka með þessa tillögu, draga hana til baka, því hún er ekki að uppfylla þessi formsatriði sem venja er um á vinnumarkaði. Ef það er ekki gert er tímabært að endurskoða þetta ákvæði í lögum.“

Ráðherra gæti þurft að grípa inn í

Er ríkissáttasemjari að reyna að auka sínar valdheimildir með þessu?

 „Já, þarna er ríkissáttasemjari að reyna að auka valdheimildir sínar með því að brjóta niður þær venjur sem hafa verið á vinnumarkaði. Það er auðvitað algjörlega galið að grípa til þeirra aðgerða á þessum tímapunkti. Ég held hann þurfi að sjá að sér í þessu, draga þetta til baka og gefa samningsaðilum færi á að semja.“

Jafnvel þurfi ráðherra að grípa inn í.

„Það gæti alveg farið svo að ráðherra þurfi að grípa inn í þessa stöðu. Nú þekki ég ekki hvaða heimildir hann hefur en það er auglóst að það þarf að afstýra þessu. Það er auðvitað samt sem áður ríkissáttsemjari sem þarf að taka ákvörðun og stíga skrefið.“

Aðalsteinn Leifsson, ríkissáttasemjari vildi ekki tjá sig um stöðu mála þegar fréttastofa náði af honum tali fyrir hádegi. Þá náðist ekki í Guðmund Inga Guðbrandsson, vinnumarkaðsráðherra, við gerð fréttarinnar.