Rafmögnuð stemning í Kópavogi í kvöld

Verk Þórönnu, Tillit, er unnið upp úr myndbandsupptökum af augnatillitil Kópavogsbúa en Þóranna byggir verkið á hugmyndum listakonunnar Gerðar Helgadóttur. Gerður gerði á sínum tíma tillögu að altaristöflu fyrir Kópavogskirkju með hinu alsjáandi auga sem ekki varð af og má segja að Þóranna taki upp þráðinn. Þóranna vann einnig hljóðverk út frá hljóðheimi Kópavogs sem leikið er inni í kirkjunni.

Skilningarvitin þanin

Elísabet Indra segir leik með skynjun og skilningarvitin eins og rauðan þráð í gegnum dagskrá hátíðarinnar í ár.

„Hönnunarhópurinn ÞYKJÓ sýnir til að mynda á Náttúrufræðistofu Kópavogs verkið Sjónarspil sem hverfist um ólíka sjónskynjun dýra og manna. Verkið samanstendur af þremur kössum með gægjugötum og í gegnum gægjugötin sést safngripur frá Náttúrufræðistofu. Gripurinn breytir um ásýnd eftir því úr hvaða gægjugati er horft í samræmi við ólíka sjónskynjun. Verkið unnu þau í samvinnu við líffræðinga á Náttúrufræðistofu, vísindamenn frá Vísindasmiðju Háskóla Íslands og börnin á leikskólanum Marbakka,“ útskýrir Elísabet Indra.

Vísindasmiðjan mun einnig bjóða upp á smiðju frá 18 – 20 sem meðal annars hverfist um sjónskynjun og þá verður boðið upp á Silent diskó á Bókasafni Kópavogs. 

Tónlist verður í stóru hlutverki á hátíðinni og má þar nefna suðuameríska sveiflu í fordyri Salarins en þar stígur hljómsveitin Los Bomboneros á stokk.

„Los Bomboneros er frábær íslensk hljómsveit sem vinnur með tónlistararf Kólumbíu, Mexíkó og Perú. Með þeim mun Skólahljómsveit Kópavogs troða upp en hún kemur líka fram á Hljóðabókasafni Íslands. 

Þá verður Hildigunnur Einarsdóttir mezzósópran með söngleiðsögn í gegnum glænýja sýningu sem var opnuð í Gerðarsafni í gær. Sýningin ber titilinn Að rekja brot eða Tracing fragments en að henni stendur fjölþjóðlegur hópur listamanna sem á rætur sínar að rekja til undirokaðra hópa. Þau segja sína sögu og hverfast verkin um hugtök á borð við þrælahald, nýlendur, yfirráð og kúgun,“ segir Elísabet Indra en sýningarstjóri er Daría Sól Andrews.

Hljóðbókasafnið opnar dyr

Hægt verður að fylgjast með hljóðbókalesurum að störfum á Hljóðbókasafninu á Safnanótt en almenningi gefst nú tækifæri í fyrsta sinn að skoða tæki og tól safnsins og kynna sér starfsemina. 

Rithöfundarnir Sigríður Hagalín Björnsdóttir og Jón Kalman ræða verk sín og lesa úr þeimá Bókasafni Kópavogs og þá mun Héraðsskjalasafnið sýna tvær kvikmyndir eftir Martein Sigurgeirsson, annarsvegar um sögu Breiðabliks og hins vegar um frumbyggja Kópavogs.

Hin segulmögnuðu Gallerí Göng snúa aftur en þar gæðir ungt vegglistafólk gömlu skiptistöðvargöngin við Digranesveg lífi. Þá verður Y gallerý í gömlu Olísstöðinni við Hamraborg einnig opið til klukkan 22 og Örn Alexander Ámundason mun sýna þar gjörninginn Klemmdur klukkan 19:30.

„Dagskráin verður mjög þétt frá klukkan 18 til 23 í kvöld og fyrir svanga verður pop up pizzuvagn á staðnum og létt veitingasala í Salnum. Á morgun heldur hátíðin áfram, meðal annars með gítareinleikstónleikum Svans Vilbergssonar, fjölþjóðlegu sviðslistaverki í þróun og sundlaugarpopupviðburði í Salalaug.

 Menningarlífið kraumar hér í Kópavogi þar sem við höfum þessa miklu nálægð milli ólíkra menningarhúsa og ólík orka rennur saman. Það er mikill metnaður fyrir menningu hér í Kópavogi,“ segir Elísabet Indra.

Nánar má kynna sér dagskrá Vetrarhátíðar í Kópavogi hér.