Segir dýpsta sannleikann koma fram í flæði

„Þetta er fyrsta sóló skrefið mitt og lagið hefur verið til í um tvo mánuði. Ég er með plötu á leiðinni en þetta er fyrsti síngúllinn af henni.“

Hér má heyra lagið:

Á eigin forsendum

Hann segir það hafa tekið smá tíma að kýla á það að gefa út eigið efni án annarra.

„Þetta hefur verið lengi að þróast en fyrsta sóló lagið mitt er fjögurra ára gamalt. Ég er því búinn að vera að taka upp sóló tónlist jafn lengi og ég hef verið í tónlist en aldrei gefið hana út. Ég tók þessu ekki alvarlega fyrr en í fyrra. Fyrst var þetta bara hobbý og ég var alltaf að pródúsera fyrir aðra.“

Hann segir straumhvörf hafa átt sér stað fyrir nokkru síðan þegar hann gerði lag fyrir vin sinn, rapparann Daniil.

„Þá gerði ég sóló lag sem ég sýndi Daniil og hann hoppaði á. Út frá því sá ég fyrir mér að geta líka gefið út sóló efni einn.

Síðan þá er ég búinn að vera uppi í stúdíói á hverjum degi og núna er loksins komið eitthvað sem ég er sáttur með. Það er gott að taka þetta skref og gera þetta á mínum forsendum.“

Skrifar ekki texta fyrir fram

Aðspurður hvað nýja lagið fjalli um segir Ísleifur:

„Það fjallar um að vera fastur með stelpu á heilanum. Mér fannst gaman að gefa þetta út á Valentínusardaginn og brjóta líka upp þessa hefð að gefa alltaf út lag á föstudegi. Þetta er orkumikið hálfpartinn ástarlag sem einkennist af miklu fjör. 

Lagið er byggt á minni persónulegu reynslu en ég skrifa aldrei textana fyrir fram heldur freestyle-a þá og þeir koma beint út mómentinu.“

Hann segist því alltaf reyna að leyfa textunum að koma náttúrulega í flæðinu. Stundum heppnist það ótrúlega vel og stundum ekki.

„Þetta er mín leið til að vinna, ég sest aldrei niður og skrifa texta en dett bara inn í upptöku flæði og eitthvað vibe.“

Þægilegt tjáningarform

Blaðamaður spyr hann þá hvort tónlistin nýtist honum vel við að vinna úr tilfinningum.

„Já, milljón prósent. Ég veit ekki hvar ég væri ef það væri ekki fyrir tónlist og það er mjög þægilegt að ná að tjá mig á þennan hátt. Ég kem sjálfum mér oft á óvart, þegar maður dettur til dæmis inn í eitthvað zone. Þá koma stundum línur eða taktar sem sjokkera mig og koma mér á óvart. 

En það er alltaf dýpsti sannleikurinn sem kemur fram þegar maður reynir að hafa ekki of mikið fyrir þessu.“

Upp og niður eins og lífið

Ísleifur Eldur lýsir tónlistarstíl sínum sem mjög fjölbreyttum.

„Hann er upp og niður eins og lífið getur verið. Á nýju plötunni verða sorgleg og einlæg lög, nokkur crazy partý lög og allt milli himins og jarðar. Þetta fer allt eftir því hvernig mér líður þegar ég er að semja. 

Platan er mjög einlæg og dark á sama tíma. Hún er allavega sönn. 

Það er stundum erfitt að vera hér á Íslandi og tónlistin mín á það því til að vera dark í takt við Anxiety City,“ segir Ísleifur að lokum og vísar hér í Reykjavík.

Hér má finna allt efni Izleifs á Spotify.