Þorvaldur Davíð tók við viðurkenningu í Berlín

Samtökin velja leikarana og leikkonurnar úr hópi aðildarlanda EFP. Meðlimir samtakanna eru kvikmynda- og kynningarmiðstöðvar frá 37 löndum og er Kvikmyndamiðstöð Íslands ein af þeim.

Alls voru 27 tilnefnd í ár en að lokum voru átta konur og tveir karlar valin. Dómnefndin sem valdi hópinn er skipuð af Jan Komasa frá Póllandi, Rebeccu van Unen frá Hollandi, Mariu Ekerhovd frá Noregi, Leo Barraclough frá Englandi og Veronicu Echegui, sem áður var í hópi Shooting Stars.

Dómnefndin hrifin af Þorvaldi

Þorvaldi er hrósað í hástert í umsögn dómnefndarinnar fyrir hlutverk sitt í kvikmyndinni Svar við bréfi Helgu. Hún segir að það stafi af honum mikil útgeislun og að hann fangi fullkomlega hlutverk ástsjúks bónda sem verður heltekinn af ástríðu fyrir upprennandi skáldkonu.

„Í honum sameinast hraustlegt yfirbragð og viðkvæmni, sem laðar áhorfendur að honum og fær þá til að taka afstöðu með honum.“

Fimmtándi Íslendingurinn sem valinn er í hópinn

Það er óhætt að segja að það hafi fjölmargar stórstjörnur verið valdar í Shooting Stars hópinn. Meðal þeirra sem hafa verið valin í hann eru Maisie Williams (2015), Riz Ahmed (2012), Alicia Vikander (2010), Carey Mulligan (2009), Nikolaj Lie Kaas (2003), Daniel Brühl (2003) og Daniel Craig (2000)

Þá er Þorvaldur ekki fyrsti Íslendingurinn sem valinn er í þennan hóp. Alls hafa fjórtán Íslendingar áður verið valdir en þeir eru:

• Ingvar E. Sigurðsson 1999.
• Hilmir Snær Guðnason 2000.
• Baltasar Kormákur 2001.
• Margrét Vilhjálmsdóttir 2002.
• Nína Dögg Filippusdóttir 2003.
• Tómas Lemarquis 2004.
• Álfrún Örnólfsdóttir 2005.
• Björn Hlynur Haraldsson 2006.
• Gísli Örn Garðarsson 2007.
• Hilmar Guðjónsson 2012.
• Edda Magnason (íslensk/sænsk leikkona sem var valin fyrir hönd Svíþjóðar) 2014.
• Hera Hilmarsdóttir 2015.
• Atli Óskar Fjalarsson 2016.
• Krístín Þóra Haraldsdóttir 2019.