Lifnar yfir bleikjuveiði í Vífilstaðavatni

Ef það vorar þokkalega með sólríkum og hlýjum dögum fer klakið oft hressilega vel í gang og þá er oft fín veiði í vatninu en það er kúnst að fá þessar bleikjur til að taka. Bæði getur hún verið einstaklega vandlát á hvað hún er að taka og svo á hún til með að sýna sig um allt vatn hluta úr degi með vök út um allt, en er svo horfin stuttu síðar. 

Síðustu dagar hafa verið ágætir í vatninu hjá þeim sem þekkja lífríki þess vel og vita hvað á að setja undir. Þeir sem hafa verið á réttum tíma og auðvitað á réttum stað með rétta agnið hafa flestir eftir því sem við heyrum verið að týna upp tvær til þrjár bleikjur eftir nokkra tíma. Það telst fín veiði í þessu vatni en það er nóg af bleikju í því þó svo að margir haldi því fram að henni sé fækkandi. Reynslan sker yfirleitt best út um það hverjir eru í fiski og hverjir ekki. Eins og með mörg vötn þarf að þekkja vatnið og hegðun fiskins vel til að ná árangri og það' er ekkert sem skilar meiri árangri en góð ástundun og skoðun á lífríkinu.