„Hvernig í ósköpunum lét Valur hana fara frá sér?“

Katla skoraði tvö mörk og lagði upp eitt þegar Þróttur sigraði FH, 4-1, í 1. umferð Bestu deildarinnar á þriðjudaginn. Katla er uppalin hjá Val en hefur spilað með Þrótti undanfarin tvö tímabil.

„Ég hugsa stundum hvernig í ósköpunum lét Valur hana fara frá sér?“ sagði Helena Ólafsdóttir í Bestu mörkunum.

„Það er ótrúlegt,“ sagði Bára Kristbjörg Rúnarsdóttir. „Hún er svo ótrúlega skapandi. En Valur býr að þeim lúxus að geta sótt sér alla þá leikmenn sem þeir vilja. Hvað voru þeir búnir að sækja marga þegar hún átti að fá tækifærið?“

Harpa Þorsteinsdóttir velti fyrir sér hvort félagaskipti Kötlu til Þróttar hefðu ekki verið best fyrir alla hlutaðeigandi.

„Sjáðu hvað þetta var gott skref fyrir hana. Mögulega átti þetta samtal sér stað. Valur var aldrei að fara að spila þessum leikmanni jafn mikið og Þróttur og Þróttur á þeim stað í deildinni sem þeir eru, ég segi bara frábær ákvörðun fyrir hana,“ sagði Harpa.

„Hundrað prósent og þegar það er ekki verið að nýta svona efnilega leikmenn að senda þá á lán eða skipta. En það er kannski spurning hvort svona stórlið gætu nýtt þessa efnilegu leikmenn betur.“

Umræðuna um Kötlu úr Bestu mörkunum má sjá í spilaranum hér fyrir ofan.