Mbuemo allt í öllu í endurkomu Brentford gegn Spurs

Brentford er áfram með í baráttunni um sæti í Evrópukeppni eftir 3-1 útisigur á Tottenham í dag. Bryan Mbuemo var maðurinn á bakvið endurkomu Brentford.

Fyrir leikinn í dag var Brentford í 9.sæti deildarinnar, fjórum stigum á eftir Tottenham sem var í 7. sætinu en það er síðasta sætið sem gefur Evrópusæti. Brentford þurfti því nauðsynlega sigur en á milli liðanna er Aston Villa í 6. sætinu með jafn mörg stig og Tottenham en Villa á leik við Liverpool nú á eftir.

Markahrókurinn Harry Kane opnaði markareikninginn í dag. Hann skoraði þá með frábæru skoti eftir aukaspyrnu en markið er hans þrítugasta á tímabilinu í öllum keppnum.

Staðan í hálfleik var 1-0 en í síðari hálfleik greip Bryan Mbuemo til sinna ráða. Hann jafnaði metin í 1-1 á 50. mínútu, kom Brentford í 2-1 á 62. mínútu og tveimur mínútum fyrir lok venjulegs leiktíma lagði hann upp þriðja mark Brentford fyrir Yoane Wissa.

Ótrúlegur viðsnúningur Brentford og 3-1 sigur þeirra staðreynd. Brentford er því enn með í baráttunni um sæti í Sambandsdeildinni á næsta tímabili.