Nýbyggingar, endurvinnsla og seðlabankastjóri á Sprengisandi

Björg Ásta Þórðardóttir, sviðsstjóri Mannvirkjasviðs Samtaka Iðnaðarins, fjallar um nýja greiningu samtakanna á byggingamarkaði. Þar kemur fram að áætlanir um uppbyggingu íbúða sem halda eiga í við fólksfjölgun séu í uppnámi vegna efnahagsástandsins. Byggingarmarkaður hefur snögghemlað að mati samtakanna.

Stefán Gíslason, einn helsti sérfræðingur í umhverfismálum fjallar um hringrásarhagkerfið og þann álitshnekki sem það hefur beðið í ljósi frétta síðustu vikna, þar sem kortlagðar hafa verið blekkingar endurvinnsluiðnaðarins sem segist endurvinna og endurnýta hráefni en brennir það í raun í evrópskum þungaiðnaði. Stefán telur það ekki endilega slæmt.

Ásgeir Jónsson Seðlabankastjóri fjallar um efnahagsmálin, vaxtahækkanir, kjaramálin og verðbólguna sem bankinn telur nú þrálátari en áður og lýsir mati bankans á framhaldinu. Verðbólga verður viðvarandi, vextir verða áfram hækkaðir þangað til hagkerfið kólnar voru síðustu skilaboð Peningastefnunefndarinnar.

Kristján Hreinsson, ljóðskáld, stundum kenndur við Skerjafjörð, kom illilega við kauninn á mörgu fólki með umfjöllun sinni um réttindi minnihlutahópa og endaði með því að hann var rekinn frá HÍ. Nú hefur hann reyndar verið endurráðinn og beðinn afsökunar á brottvikningunni.