Hagar högnuðust um tæplega 700 milljónir

Árshlutareikningur Haga hf. fyrir fyrsta ársfjórðung 2023/24 var samþykktur af stjórn og forstjóra félagsins á stjórnarfundi þann 28. júní 2023. Reikningurinn er fyrir tímabilið 1. mars til 31. maí 2023. Árshlutareikningurinn hefur að geyma samstæðureikning félagsins og dótturfélaga þess.

Í reikningnum segir að vörusala á fjórðungnum hafi numið 41,49 milljörðum króna, sem er 8,6 prósent vöxtur milli ára. Hagnaður hafi verið 653 milljónir króna en hann var 926 milljónir í fyrra.

Eigið fé hafi numið 27,75 milljörðum króna í lok tímabils og eiginfjárhlutfall 37,4 prósent.

Rekstrarumhverfið krefjandi

Í tilkynningu um reikninginn er haft eftir Finni Oddssyni, forstjóra Haga, að starfsemin hafi heilt yfir gengið vel.

„Líkt og undanfarin misseri þá var rekstrarumhverfi smásölu krefjandi, en það hefur einkennst af miklum hækkunum á verði matvöru og almennt hækkandi rekstrarkostnaði. Hvoru tveggja má að minnsta kosti að hluta rekja til áhrifa stríðs í Úkraínu og eftirstöðva Covid-19 faraldursins,“ er haft eftir honum.

Olís ástæða lægri afkomu

Afkoma samstæðunnar dregst lítillega saman á milli fjórðunga en meginástæða þess er sögð liggja í því að starfsemi Olís skilaði lægri afkomu en í fyrra. 

Tekjur vegna eldsneytissölu námu 12,7 milljörðum króna og drógust saman um 8 prósent, sem skýrist fyrst og fremst af því að heimsmarkaðsverð olíu lækkaði töluvert á milli ára. 

„Heildarsala eldsneytis í lítrum stóð svo til í stað, áfram sterk á smásölumarkaði og í sölu til stórnotenda, þrátt fyrir að heldur hafi dregið úr umsvifum útgerða vegna minni kvóta. Heildarumsvif hjá Olís voru í samræmi við áætlanir, en lækkun á heimsmarkaðsverði olíu á fjórðungnum leiddi til lægri framlegðar af sölu til stórnotenda,“ er haft eftir Finni.

Verðbólgan eykur vöxt

Haft er eftir Finni að mikill vöxtur hafi áfram verið í sölu verslana og vöruhúsa, en tekjur hafi aukist um átján prósent á milli fjórðunga. Þessa aukningu megi annars vegar rekja til verðbólgu, hækkandi verðs aðfanga frá heildsölum og framleiðendum, sem hefur verið viðvarandi viðfangsefni síðustu misseri. 

„Hins vegar er ánægjulegt að tekjuvöxtur er einnig til kominn vegna aukinna umsvifa í dag- og sérvöruhluta samstæðunnar því seldum stykkjum og heimsóknum viðskiptavina fjölgaði umtalsvert á tímabilinu. Þetta er sérstaklega áberandi í Bónus, en síðustu fjórðunga hefur þeim sem sækja í hagkvæmasta verslunarkostinn á dagvörumarkaði fjölgað umtalsvert. Að sama skapi fjölgaði viðskiptavinum Hagkaups og mikil aukning er í netverslun Eldum rétt þar sem æ fleiri viðskiptavinir sækja í þægindi, hagkvæmni og gæði heimsendra matarpakka í viku hverri. Afkoma af verslunum og vöruhúsum jókst miðað við sama fjórðung í fyrra.“

Opna fleiri verslanir fljótlega

Í tilkynningu segir að á fjórðungnum hafi náðst áfangar sem hafa það að markmiði að efla þjónustu við viðskiptavini og styrkja starfsemi Haga enn frekar. Til að mynda hafi ný verslun Bónus verið opnuð í Norðlingaholti. 

Þá segir í fjárfestakynningu ársfjórðungsins að félagið hyggi á frekari stækkanir. Þannig flytji Bónus í Holtagörðum í annað og stærra rými innan hússins og núverandi búð verði lokað og ný verslun verði opnuð í Miðhrauni í Garðabæ.

• fjarfestakynning-1f-2023-24PDF5.2MB
  Sækja skjal