„Breiðablik er ekki með marga unga leikmenn og meðalaldur liðsins er frekar hár“

„Þetta er lið sem við berum alla virðingu fyrir þar sem þeir eru nokkuð vanir að spila svona leiki. Þeir sigruðu Austria Vín fyrir tveimur árum og spiluðu mjög vel í heimaleiknum gegn Istanbul Basaksehir í fyrra,“ sagði Neestrup í samtali við Val Pál Eiríksson í gær.

„Breiðablik er ekki með marga unga leikmenn og meðalaldur liðsins er frekar hár sem er ekki hefðbundið. Þeir vita því út á hvað þetta gengur. Þetta er mjög reynt lið sem er með mikið sjálfstraust þar sem það hefur unnið fimm leiki í röð. Ég er hrifinn af því sem ég hef séð. Þetta er gott lið sem er vel þjálfað. Þeir eru góðir með boltann, góðir að byggja upp sóknir og ég er hrifinn af gegnumbrotunum þeirra. En þetta er lið sem er vant að hafa boltann. Við berum virðingu fyrir þeim en vitum að ef við gerum okkar eigum við góða möguleika á að komast áfram.“

Neestrup segir að það að leikurinn fari fram á gervigrasi muni hafa á gang mála.

„Það hefur alltaf áhrif því það er miklu erfiðara að pressa og stoppa og breyta um stefnu án bolta. En við erum nokkuð vanir því. Nordsjælland og Silkeborg spila á gervigrasi og við höfum mætt þeim margoft. Þetta er ekki afsökun fyrir okkur fyrir því að standa okkur ekki en þetta hefur almenn áhrif á leikinn.“

Tveir Íslendingar eru í herbúðum FCK; Ísak Bergmann Jóhannesson og Orri Steinn Óskarsson, sonur Óskars Hrafns Þorvaldssonar, þjálfara Breiðabliks.

„Við sjáum til hvort þeir spili. Þetta eru tveir góðir leikmenn. Orri er ótrúlegur í vítateignum. Ísak hefur verið svolítið frá byrjunarliðinu en það þýðir ekki að við höldum ekki að hann sé góður leikmaður. Hann er góður leikmaður og frábær drengur sem leggur sig allan fram á hverjum degi. Ef hann spilar, hvort sem hann byrjar inn á eða kemur af bekknum, er ég viss um að hann muni standa sig,“ sagði Neestrup.

Horfa má á viðtalið við Neestrup í spilaranum hér fyrir ofan.