Nýjung í lang­tíma­leigu: skipti­bílar

Þægindi er meginástæða þess að fólk tekur bíl á langtímaleigu og þar er sveigjanleiki lykilatriði. Nú bætir Brimborg enn frekar í þægindin, eykur sveigjanleika og kynnir skiptibíla fyrir viðskiptavini langtímaleigunnar.

Samkvæmt Antoni Smára Rúnarssyni, framkvæmdastjóra bílaleigu Brimborgar, geta skiptibílar verið bylting á markaðnum. „Við vitum að viðskiptavinir okkar þurfa stundum aðeins öðruvísi bíl tímabundið en þeir eru að leigja til lengri tíma, til dæmis í tengslum við ferðalög. Oft er þetta ástæðan fyrir því að fólk annað hvort kaupir eða leigir stærri og dýrari bíl en þörf er á dags daglega.

Þess vegna ákváðum við að bjóða upp á skiptibíla sem virka þannig að leigjendur langtímaleigubíla frá Brimborg geta komið og fengið t.d. sjö manna bíl, bíl með dráttarbeisli eða skíðafestingum svo eitthvað sé nefnt, í nokkra daga eða vikur á mjög hagstæðu verði.“

„Fólk getur til dæmis verið með meðalstóran rafbíl í langtímaleigu en skipt yfir á rúmgóðan jeppa sem dregur auðveldlega hjólhýsi langar vegalengdir í sumarfríinu eða þegar þörf er á sendibíl í nokkra daga. Það eru í rauninni óteljandi ástæður fyrir því hvers vegna fólk þarf á skiptibíl að halda og við erum mjög ánægð að geta boðið fólki þennan sveigjanleika í langtímaleigunni,“ segir Anton

Nýr langtímaleiguvefur Brimborgar

Ekki er langt síðan nýr og notendavænn vefur fór í loftið. „Við erum að kynna skiptibílahugtakið núna í tengslum við glænýjan langtímaleiguvef sem er með fullkominni leitarvél fyrir nýja og notaða bíla í langtímaleigu frá Brimborg. Fólk sér í rauntíma nákvæmlega hvaða bílar eru í boði og fer í gegnum auðvelt ferli á vefnum til að panta. En að sjálfsögðu mæta líka margir til okkar og prófa bílana áður.“

Opnunartilboð á Polestar 2 í langtímaleigu

Á vefnum verða alla jafna frábær tilboð á nýjum og notuðum bílum í langtímaleigu, og stórstjarnan Polestar 2 sem er gríðarlega öflugur rafbíll fær sviðsljósið fyrst um sinn. „Polestar 2 hefur í gegnum tíðina verið vinsælasti nýi bíllinn í langtímaleigu hjá Brimborg og því viljum við bjóða hann á frábæru verði í tengslum við opnunina. Þeir renna út hjá okkur eins og ís í brauðformi á góðum sumardegi, það er takmarkað magn af þeim í boði svo fyrstur kemur, fyrstur fær.“

„Rúsínan í pylsuendanum er svo að Brimborg er að byggja upp Hraðhleðslunet sem er opið öllum rafbílum og viðskiptavinir okkar sem eru á rafbíl fá sérkjör á rafhleðslu fyrir bílana sína í því. Það er því minni þörf en áður að vera með hleðslustöð heima hjá sér. En hafi viðskiptavinir aðstöðu til þess þá geta þeir pantað hleðslustöð ásamt uppsetningarþjónustu hjá Brimborg með langtímaleigubílnum sínum, allt bókanlegt á vefsíðunni.“