Já sæll, fimm tvíburapör í sama bekknum á Sauðárkróki

Í Árskóla eru um 400 nemendur frá fyrsta bekk og upp í tíunda bekk. Í skólanum eru níu tvíburar en fyrsti bekkur fær þó alla athyglina þegar tvíburar eru annars vegar því þar eru fimm tvíburar.

„Reyndar hérna á Sauðárkróki þá gerðist þetta líka 1991 að það byrjuðu fimm pör að hausti, þannig að þetta er eitthvað sérstakt hérna við krókinn,” segir Sigríður Stefánsdóttir ein af þremur umsjónarkennurum bekkjarins.

En hvernig skýrir þú þetta, er þetta vatnið eða tómatarnir eða?

„Já, bara loftið, samveran, fólkið, samfélagið, ég held að það sé eitthvað svoleiðis,” segir hún hlæjandi.

Sigríður segir frábært að vera kennari í Árskóla.

„Þetta er skemmtilegt umhverfi og góður skóli, ég segi það bara og stend við, Árskóli er góður.”

Og skólastjórinn, Óskar G. Björnsson á meira að segja tvíbura með sinni konu, Erlu Kjartansdóttur, sem vinnur á bókasafni skólans en þeir eru hvorki í fyrsta bekk né í skólanum enda komnir á fertugs aldur.