Saga Garðars blómleg á uppistandi: „Það er nýtt barn á leiðinni“

„Það er nýtt barn á leiðinni,“ tilkynnti Saga á uppistandssýningunni Púðursykur sem haldin var í Sykursal Grósku um helgina. Saga var meðal þeirra uppistandara sem héldu uppi fjörinu en hún kom fram í glæsilegum kjól þar sem kúlan fékk að njóta sín. 

Sjálf sagði Saga í uppistandsatriði sínu að hjónin vissu ekki kyn barnsins. Þau vonuðust þó til, á léttum nótum, að um aðra stúlku væri að ræða, enda væru stelpur geggjaðar. Barnið er væntanlegt í heiminn í desember. 

Í uppistandinu gantaðist Saga með hina ýmsu kvilla sem geta hrjáð barnshafandi konur svo sem bólgna fætur og þvagleka við hnerra.

Fyrir eiga hjónin eina stúlku, Eddu Kristínu, fædda árið 2018. Árið var sannkallað tímamótaár í lífi þeirra Sögu og Snorra þar sem þau létu pússa sig saman á sumarmánuðum við hátíðlega athöfn á Suðureyri á Vestfjörðum.