Upp­lifðu skíða­göngu­ævin­týri og dekur á Siglu­firði

Undanfarin ár hefur Sigló hótel á Siglufirði boðið upp á mjög vinsælt pakkatilboð sem inniheldur mat og gistingu á glæsilegu Sigló hóteli og skíðagöngunámskeið sem hentar vel byrjendum og lengra komnum segir Aron Pálsson, hótelstjóri Sigló hótels.

„Um er að ræða þriggja daga námskeið undir handleiðslu reynslumikils skíðagöngufólks en námskeiðin hafa selst upp á skömmum tíma undanfarin ár. Skíðagöngunámskeiðin hafa verið haldin hér í mörg ár og við höldum áfram því góða starfi eftir að Keahótels tóku við rekstri hótelsins.“

Framúrskarandi aðstaða

Hann segir svæðið í kringum Siglufjörð vera gullfallegt og það eitt og sér sé stór ástæða þess að námskeiðin hafa verið vel sótt. „Siglfirsku alparnir skarta sínu fegursta þegar snjórinn liggur yfir. Við bætum svo við framúrskarandi veitingum, afslöppun og góðri þjónustu sem ætti að vera ansi góð uppskrift af góðu fríi.“

Enda er fátt sem jafnast á við það, eftir góðan dag á skíðum, að skella sér í heita pottinn og sauna á Sigló hótel og fá sér drykk við heitan arininn í arinstofunni. „Hingað koma sömu gestir ár eftir ár til að sækja þessi námskeið og erum við afar stolt af því. Það gefur til kynna að okkur hefur tekist vel að mæta væntingum þeirra.“

Sigló hótel opnaði sumarið 2015 og hefur verið afar vinsæll gististaður meðal innlendra og erlendra ferðalanga síðan. „Við hönnun hótelsins var mikið lagt upp úr hljóðvist og hönnun sem er stílhrein en notaleg. Í því sambandi má nefna að Sigló hótel hlaut íslensku hljóðvistarverðlaunin árið 2022 fyrir framúrskarandi hljóðvist á veitingastað.

Hótel þar sem hægt er að njóta

Hann segir að hótelið eigi að vera áfangastaður og að gestum þess eigi að finnast þeir hafi allt til alls til að njóta. „Það er eitthvað sem við erum ekki alltaf vön á Íslandi en oft eru hótel meira bara rétt næturstaður meðan við ferðumst um okkar fallega land. Hér viljum við að gestir komi til að vera, herbergin eru rúmgóð og útsýni úr þeim eitthvað sem er ekki á hverju strái, hvort sem það eru fjallatopparnir, smábátarnir eða bara sjórinn með allri sinni dýrð. Útipotturinn á hótelinu er alltaf jafn vinsæll en að fljóta þar og horfa út á sjóinn, stjörnurnar, jafnvel norðurljósin ef maður er heppinn, er svo sannarlega mikil upplifun.“

Hægt að kúpla sig alveg út og njóta lífsins

Undanfarin ár hafa vinsældir Siglufjarðar sem áfangastaðar yfir veturinn aukist mikið enda engin furða. „Náttúrufegurðin spilar auðvitað stórt hlutverk þar enda bærinn umkringdur fallegum háum fjöllum og útsýni út á haf. Svo má ekki gleyma öllu því frábæra fólki sem annast námskeiðin með okkur. Kennararnir eru allir með tölu framúrskarandi og það samstarf er stór partur í því að námskeiðin eru jafn vinsæl og þau eru.“

Veitingamenn Sigló hótel fara einnig fram úr sér í dekri að hans sögn. „Hér er mikið lagt upp með að ná að fanga þessa stemningu sem einhverjir þekkja frá ferðalögum erlendis, meðal annars þá tilfinningu að vera í umhverfi þar sem hægt er að kúpla sig alveg út og njóta lífsins til fullnustu.“

Nánari upplýsingar á vef Sigló hótels.