Samdi við ungmennalið og klárar tíunda bekk á Tenerife

Karfan greinir frá því að félagið hafi hrifist af Bóasi þegar hann var við æfingar hjá þeim í sumar. Hann hafi í kjölfarið þegið samningsboð um að æfa og spila með ungmennaliði félagsins á þessu tímabili. 

Bóas er fæddur árið 2008 og hefur því ekki enn lokið grunnskólagöngu sinni en hyggst gera það úti. Hann er uppalinn Keflvíkingur og hefur leikið fyrir yngri landslið Íslands. 

Hann gengur þar með í góðan hóp Íslendinga sem spila körfubolta á Spáni. Martin Hermannsson og Tryggvi Snær Hlinason spila með Valencia og Bilbao í efstu deild karla á meðan Sara Rún Hinriksdóttir leikur með AE Sedis Básquet í úrvalsdeild kvenna. Jón Axel Guðmundsson er svo leikmaður Alicante í næst efstu deild.