Fái að fresta prófum til að spila fyrir Ís­lands hönd

Þetta var til að mynda raunin á HM fyrir ári síðan þar sem landsliðskonur Íslands sátu sveittar yfir námsbókum eða við fartölvuna á milli leikja þegar best væri auðvitað að þær gætu hvílst og einbeitt sér alfarið að undirbúningi fyrir leikina.

Arnar Pétursson landsliðsþjálfari segir að vinna sé búin að vera í gangi í þessum efnum með það í huga að EM í Rúmeníu í desember fái forgang og að hægt verði að færa til próf og verkefnaskil vegna mótsins.

„AMÍ [Afreksmiðstöð Íslands] og ÍSÍ [Íþrótta- og Ólympíusamband Íslands] fóru í það með okkur að vinna með skólunum að lausn á þessu og ég veit að það samtal gengur ágætlega,“ sagði Arnar við Vísi í dag eftir að hafa kynnt EM-hópinn sinn. 

Fjölgað hefur í hópi þeirra landsliðskvenna sem spila með erlendum félagsliðum en það kemur ekki í veg fyrir að það séu margir námsmenn í hópnum.

„Ég veit að stelpurnar eru í ágætu sambandi við sína kennara og sína deildarstjóra þannig að við þurfum ekki að lenda í þessari stöðu aftur. Að þessar stelpur fái frest á prófum og smá svigrúm til þess að njóta þess að vera á stórmóti og setja alla einbeitinguna á það,“ sagði Arnar í lok viðtalsins hér að neðan.

Eins og fyrr segir hafa leikmenn jafnvel þurft að þreyta lokapróf sama dag og þær hafa spilað leiki á stórmóti.

„Það er nóg að gera. Maður fær engar pásur sko. Kennarinn minn er búinn að sýna mikinn skilning en ég veit að það voru ekki allar jafn heppnar með það,“ sagði Katrín Tinna Jensdóttir við Vísi á HM í fyrra.

„Mér finnst algjört lágmark að skólar sýni þessu skilning og komi eins vel til móts við leikmenn og hægt er,“ bætti hún þá við.

Arnar benti á það á HM í fyrra að í raun ættu leikmenn frekar skilið umbun fyrir að spila fyrir Íslands hönd á stórmóti frekar en að það kæmi niður á þeim:

„Áreitið er nóg fyrir og það er mikið álag á þeim í kringum handboltann. Þess væri óskandi að þessu væri háttað öðruvísi, að þessar stelpur fengju eitthvað fyrir það að vera í þessu, fengju eitthvað fyrir það að vera hérna á heimsmeistaramóti og það væri borin aðeins meiri virðing fyrir því,“ sagði Arnar á HM fyrir ári.