Prófessor með bak­grunn hjá NCAA, NFL og NBA til HR

Í tilkynningu kemur fram að hann hafi meðal annars starfað sem íþróttafræðingur við University of Oregon og hjá Oregon Ducks í bandarísku NCAA-háskóladeildinni, sem styrktar- og þrekþjálfari hjá Oakland Raiders í NFL-deildinni, við FIFA-læknastöðina og Ólympíumiðstöðina í Þýskalandi og er nú í samstarfi við NBA Global Academy. 

„Hugh starfaði einnig um skamma hríð hjá AZ Alkmaar FC í Hollandi. Enn fremur hefur hann víðtæka reynslu af ráðgjöf og rannsóknum með fagaðilum eins og slökkviliðsmönnum og sérsveitum.

Bæta frammistöðu og minnka meiðsli

Hugh er reynslumikill kennari og vísindamaður, ásamt því að vera eftirsóttur fyrirlesari í faginu. Rannsóknarefni hans hafa snúist um að þróa gagnreyndar aðferðir til að bæta frammistöðu og minnka áhættu á meiðslum. Einkum hefur hann skoðað samhengi þreytu, endurheimtar, svefns, meiðsla og þjálfunarálags. Hugh lauk doktorsprófi í íþróttafræðum við Saarland University í Saarbrücken í Þýskalandi árið 2017 og kláraði grunnnám og meistaragráðu við University of Wollongong í Ástralíu fjórum árum fyrr,“ segir í tilkynningunni.

Ísland ætíð heillað hann

Haft eftir Hugh að hann sé mjög spenntur fyrir því að bætist í hópinn hjá íþróttafræðideild Háskólans í Reykjavík. 

„Ísland hefur alltaf verið land sem hefur heillað mig með náttúrufegurð sinni, sköpunargleði og sjálfbærni. Fólkið hérna hefur verið virkilega gestrisið og móttökurnar afskaplega góðar. HR er alþjóðlega þekktur sem framsækinn nýsköpunarháskóli og ég get vonandi bætt einhverju við mannauðinn í HR með mínum bakgrunni í þekkingu og reynslu. Meðal annars þegar kemur að því að finna fleiri samstarfsaðila í okkar fagi í viðleitni okkar að skapa þekkingu og gagnreyndar aðferðir til að bæta árangur og draga úr meiðslum. Námsskrá íþróttafræðinnar í HR er að vissu leyti samofin starfsemi landsliða og íþróttafélaga hér á landi og skapar því nemendum einstök tækifæri. Ég get ekki beðið eftir að leggja mitt af mörkum til HR, sem státar nú þegar af frábæru námi, kennslu og rannsóknum á sviði íþróttafræði,“ segir Hugh.

Himinlifandi

Hafrún Kristjánsdóttir, deildarforseti íþróttafræðideildar HR, segir starfslið einstaklega ánægt með að hafa fengið Hugh til liðs við íþróttafræðideildina. 

„Rannsóknir hans sýna og sanna að hann er afbragðsgóður rannsakandi og hann er sömuleiðis framúrskarandi kennari. Deildin okkar metur mjög starfsfólk sem býr yfir sterkri fræðilegri en þó jafnframt hagnýtri þekkingu. Sérstaklega mikilvægt í mínum huga er að Hugh hefur umtalsverða reynslu af iðkendum og vinnu á gólfinu. Sérþekking og reynsla Hugh, sérstaklega í bata og svefni, er ómetanleg fyrir Háskólann í Reykjavík, íþróttasamfélagi Íslands og þeim íslensku faghópum sem hann getur átt í samstarfi við. Við erum himinlifandi með þessa viðbót í teymið okkar,“ segir Hafrún.