Evrópuferðalagið í leka húsbílnum endar við Reykja­víkur­tjörn

„Okkur fannst ekki alveg nógu mikið að spila á 23 tónleikum á einum mánuði, þannig að við urðum hreinlega að lengja þetta og enda þetta með stæl hérna heima,“ segir Óskar Logi léttur í bragði í samtali við Vísi.

Eins og fram hefur komið hafa strákarnir í Vintage Caravan varla verið heima við á Íslandi þetta árið. Sveitin spilaði meðal annars á tónleiakferðalagi í Suður Ameríku fyrr á árinu. Óskar segir sveitina því eðli málsins samkvæmt spennta að ljúka Monuments tónleikaferðalaginu en íslenska rokksveitin Volcanova mun hita upp í kvöld líkt og undanfarinn mánuð.

Ferðuðust á milli í lekum húsbíl

Óskar segir Evrópuferðalagið hafa gengið vel. Sveitin hafi byrjað í Frankfurt í Þýskalandi og farið á milli mismunandi borga með húsbíl sem sofið var í ásamt hljómsveitarmeðlimum Volcanova.

„Maður sofnaði bara í einni borg og svo vaknaði maður í annarri. Það voru níu kojur í þessu, þetta var ágætt og leit svolítið að utan frá eins og við værum bara í einhverri útileigu. Þetta var ekki lúxus líf en húsbíllinn gerði sitt gagn, þó hann hafi vissulega lekið.“

Lak bíllinn?

„Já glugginn hjá Stefáni ákvað eitthvað kvöldið að gefa sig bara og hann vaknaði upp í rigningarblautu rúmi,“ segir Óskar hlæjandi og á þar við Stefán Ara Stefánsson, trommuleikara sveitarinnar.

„Svo fannst mygla í einhverju rúminu. Þannig að þetta var ekki fullkominn ferðamáti en þessu var öllu saman kippt í lag.“

Vintage Caravan nýtur gríðarlegra vinsælda erlendis og hefur sveitin meðal annars sagt frá því í Bítinu á Bylgjunni þegar þeir krotuðu á aðdáanda í Suður-Ameríku sem lét svo húðflúra ofan í það. Þá hefur Óskar sagt frá því í Einkalífinu á Vísi hvernig aðdáendur hafa setið um sveitina erlendis.

Voru engar uppákomu í þetta sinn?

„Heyrðu, nei, tónleikarnir gengu bara allir mjög vel og það voru allir mjög almennilegir,“ segir Óskar léttur í bragði. Hann segist þó hlakka til að binda enda á tónleikaferðalagið í Iðnó í kvöld.  Óskar segist stefna á að fara beint upp í sumarbústað til að hlaða rafhlöðurnar.

„Ég ætla að reyna að taka það rólega. Ef ég þekki mig rétt þá fer hausinn samt bara beint í næsta verkefni og það eru Led Zeppelin tónleikarnir í Eldborg í febrúar,“ segir Óskar sem segist gríðarlega spenntur fyrir því verkefni.

Sjálfur var hann nýverið í viðtali í frægasta gítarblaði veraldar, Guitar World. Hann segir skemmtilegt að hafa fengið að ræða gítarleikinn sinn loksins á opinberum vettvangi.

„Þetta er blað sem ég las alltaf sem krakki, þannig það var gríðarlegur heiður að fá að birtast þar. Ég var spurður út í allar gæjurnar mínar, hvernig ég hugsa gítarleik og svona. Þetta var skemmtilega öðruvísi og mikill nördaskapur. Maður hefur lært það fyrir löngu síðan að maður er ekkert að henda þessum atriðum í fólk. Maður er ekkert: „Á ég að segja þér hvernig lampar eru í magnaranum mínum?“

Óskar og félagar í Vintage Caravan ræddu tónleikaferðalagið í Suður-Ameríku í Bítinu á Bylgjunni þegar þeir komu heim í september síðastliðnum.