Spennandi snúningur á ljúffengri klassík

Nýjar tegundir af súkkulaðinu ljúffenga líta reglulega dagsins ljós og nú hafa tvær af vinsælustu tegundunum eignast ómótstæðileg skyldmenni. Nói Síríus hefur nefnilega tekið snúning á tveimur eftirlætis Síríus tegundum þjóðarinnar:

Síríus Rjómasúkkulaði með hnetum, rúsínum og karamellumöndlum er ný útgáfa af hinu tímalausa Rjómasúkkulaði með hnetum og rúsínum. Unaðslegar karamellumöndlur bæta nýrri vídd við þennan klassíska bragðheim. Hin nýjungin er Síríus Rjómasúkkulaði með karamellukurli, sjávarsalti og saltlakkrís. Þar bætist saltlakkrísinn við hina gómsætu blöndu af sætu og stökku karamellukurli og sjávarsalti. Niðurstaðan er einstök bragðupplifun sem öll ættu að prófa.

„Það er sérstaklega gaman að vinna með þessar hefðbundnu tegundir okkar sem löngu eru orðnar klassískar, taka á þeim svona skemmtilegan snúning,“ segir Auðjón Guðmundsson, framkvæmdastjóri markaðs- og sölusviðs Nóa Síríus. „Rjómasúkkulaði með hnetum og rúsínum er ein af okkar langlífustu Síríus tegundum og súkkulaðið með karamellukurli og sjávarsalti varð fljótt ein af grunntegundunum, slíkar voru viðtökurnar,“ bætir Auðjón við og segist aðspurður vera afar ánægður með útkomuna: „Það heppnaðist afar vel að byggja ofan á þessar klassísku tegundir og bjóða þannig bragðlaukunum upp á eitthvað óvænt í bland við það kunnuglega. Og það er sérstaklega gaman að bjóða upp á svona skemmtilega tilbreytingu á þessum dimmasta tíma ársins, glæða lífið smá birtu í skammdeginu, akkúrat þegar fólk er farið að lengja eftir fleiri sólskinsstundum.“

Nýju Síríus tegundirnar fást í takmörkuðu magni og bætast í fríðan flokk Síríus vara sem prýða hillur verslana. Eins og allar aðrar Síríus vörur eru nýju tegundirnar vottaðar af Cocoa Horizons samtökunum en það þýðir að kakóhráefnið í súkkulaðið er ræktað á ábyrgan hátt með sjálfbærni að leiðarljósi. Þannig eru bændur til dæmis aðstoðaðir við að auka fjölbreytileika uppskerunnar og nýta land sitt betur sem stuðlar að jákvæðari umhverfisáhrifum og dregur meðal annars úr eyðingu regnskóga.