Fimm sprengingar í Sví­þjóð síðasta sólar­hringinn

SVT greinir frá því að einn hafi slasast í sprengingunum í Gautaborg sem urðu með nokkurra mínútna millibili í sömu íbúðagötunni í hverfinu Västra Frölunda um klukkan hálf tvö í nótt að staðartíma.

Enginn hefur verið handtekinn vegna sprenginganna í Gautaborg í nótt, en lögregla girti af svæðið í kringum húsin tvö.

Í gærkvöldi var einnig tilkynnt um sprengingu við fjölbýlishús í Farsta í suðurhluta Stokkhólms. Þar þurfti að hlúa að tólf manns vegna höggbylgjunnar sem kom frá sprengingunni, en þeir eru ekki taldir alvarlega slasaðir.

SVT greinir frá því að alls hafi verið tilkynnt um 23 sprengingar sem þessar í Svíþjóð það sem af er ári og eru þær flestar taldar tengjast átökum glæpagengja.