Klopp: Við verðum að fara var­lega með Salah

Salah hefur verið að glíma við tognun aftan í læri. Hann meiddist í Afríkukeppninni í janúar og svo aftur eftir að hann byrjaði að spila á nýjan leik.

Salah gæti tekið þátt í fyrri leik Liverpool á móti Sparta Prag í sextán liða úrslitum Evrópudeildarinnar í kvöld. Klopp var spurður út í hann á blaðamannafundi fyrir leikinn.

„Mo Salah ferðaðist með okkur. Hann er búinn að æfa með okkur í tvo daga og er fullur af orku,“ sagði Jürgen Klopp.

„Við viljum fara varlega en það er mikið í gangi hjá okkur á þessum tímapunkti á tímabilinu. Við viljum nota hann og þetta eru því góðar fréttir,“ sagði Klopp.

Salah hefur skorað nítján mörk í öllum keppnum á leiktíðinni en hefur ekki spilað síðan 17. febrúar þegar hann kom inn á sem varamaður og skoraði í 4-1 sigri á Brentford.

„Það var óheppilegt eftir að hann var búinn að vera svona lengi frá. Hann átti ótrúlegan leik á móti Brentford en svo datt hann út. Svona er þetta bara,“ sagði Klopp.

Klopp segir að það sé ekki hans ákvörðun hvort Salah taki þátt í komandi landsleikjaglugga.

„Það er ákvörðun sem verður tekinn annars staðar. Sjáum til hversu mikið hann getur spilað með okkur núna. Ég kem ekki nálægt þeirri ákvörðun,“ sagði Klopp.