Gæðasamtöl við dótturina, mömmu eða vin­konu á leið í vinnu

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna alltaf á milli klukkan sex og hálf sjö.“

Hvað er það fyrsta sem þú gerir á morgnana?

„Mig langar ótrúlega mikið að segja að ég byrji á því að kveikja á kerti og hugleiða en hið rétta er að ég byrja alla morgna á góðum kaffibolla síðan fer ég yfir daginn í dagatalinu mínu og byrja að skoða verkefnalistann frá deginum áður og bæti á hann. 

Svo skanna ég fréttamiðla og samfélagsmiðla. Restin af fjölskyldunni og hundurinn Kátur fara oftast á fætur um klukkan sjö. Þá tekur við hefðbundinn morgun þar sem allir eru að koma sér af stað út í daginn og baðherbergin eru þétt setin eins og gengur og gerist á stóru heimili.

Miðjustelpan okkar er í MR og fær alltaf far hjá mér á morgnanna, svo við verðum að vera lagðar af stað kl. 7:40 til að sleppa við umferðina. 

Við notum ferðina oft í að fara yfir daginn og eigum góð samtöl á leiðinni en þetta er dýrmæt gæðastund fyrir okkur. 

Þegar hún er mætt í skólann hringi ég oftast í vinkonu eða mömmu og tek stutt spjall á leiðinni í vinnuna.“

Hver er eftirminnilegasti grímubúningurinn sem þú hefur klæðst? 

„Ég hef mjög gaman af því vera með skemmtilegu fólki og við fjölskyldan höfum reynt að vera árlega með grímubúningaboð í kringum Halloween með góðum vinum. Ég hef brugðið mér í margvísleg gervi í gegnum tíðina en það er svo sem ekkert eitt sem stendur upp úr.“

Í hvaða verkefni ertu að vinna helst í þessa dagana?

„Tryggingar skipta okkur öll máli og því að mörgu að huga. Það skemmtilegasta við starfið mitt er að fá tækifæri til að byggja ofan á þá góða starf sem nú þegar hefur verið unnið hjá Verði með frábæru teymi. Fyrir utan daglegan rekstur sviðsins og að vera alltaf með puttana á púlsinum þegar kemur að ánægju viðskiptavina.

Þá er það sem á hug minn og hjarta þessa dagana það hvernig við hjá Verði veitum framúrskarandi þjónustu til viðskiptavina okkar og förum fram úr væntingum þegar tækifæri gefast. Samfélagsábyrgð skiptir mig líka miklu máli og mér þykir mikilvægt að vinna fyrir fyrirtæki sem leggur sitt á vogaskálarnar þegar reynir á. Þá erum við alltaf að finna leiðir til bæta þjónustuna og færa okkur nær viðskiptavinum og erum sem dæmi nýbúin að opna þjónustuskrifstofu í Kópavogi til að stytta leiðir viðskiptavina til okkar. Samhliða því erum við að leggja aukna áherslu á frammúrskarandi stafræna þjónustu og lausnir fyrir þá sem vilja leysa málin sjálf. Ég er svo heppin að vera að vinna með frábæru fólki sem brennur fyrir því að veita góða þjónustu.

Hvernig skipuleggur þú þig í vinnu?

„Dagarnir eru búnir að vera ansi þéttir og mér finnst gaman að hlaupa hratt inn í daginn og hafa nóg fyrir stafni. Dagatalið í Outlook er minn leiðarvísir á hverjum degi. Ef ég á að vera einhvers staðar eða þarf að gera eitthvað sérstak verður það að vera í dagatalinu mínu.

Ég reyni að setja allt þar inn bæði vinnu og einkalíf, matarboð, æfingar, fermingaveislur og allt saman. 

Annars finnst mér mjög gott til að halda yfirsýn að vera með dagatals ársins sýnilegt fyrir framan mig og helstu verkefni og skoða reglulega hvernig þessu miðar áfram. 

Svo held ég að það sé nauðsynlegt að vera alltaf að vinna í því að vera betri í að forgangsraða og nýta tímann og tæknina til að hámarka afköst.“

Hvenær ferðu að sofa á kvöldin?

„Það er rosalega misjafnt en oftast um klukkan ellefu, líka stundum vel yfir miðnætti, en oftast er ég sofnuð fyrir miðnætti. En ég er svo heppin að vera ótrúlega fljót að sofna yfirleitt tekur það mig fimm til sjö mínútur að steinsofna.“