Scheffler þykir sigurstranglegastur á mótinu í ár enda er hann efstur á heimslista, vann Masters árið 2022, og hefur náð í tvo sigra og 2. sæti á síðustu þremur mótum sínum.
Scheffler og Meredith kona hans eiga von á sínu fyrsta barni í lok þessa mánaðar. Samkvæmt golfmiðlum ytra hefur Scheffler því ákveðið að fljúga beint til sinnar heittelskuðu, til Texas, sýni hún þess einhver merki að barnið sé að koma í heiminn.
Scottie Scheffler and Sam Burns could each receive a life-changing call from their very pregnant wives during the Masters, and if they do, they'll immediately withdraw from the year's first major.
— OutKick (@Outkick) April 9, 2024
READ: https://t.co/0aZWtp5gY4 pic.twitter.com/LIEqZyLBTy
Hið sama á við um Burns en settur dagur hjá Caroline konu hans er eftir viku og því ljóst að enn líklegra er að hann hætti keppni á Masters en Scheffler.
„Þetta verður ansi tryllt. Ég held að hvorugt okkar hafi áttað sig almennilega á þessu en það er spennandi fyrir okkur að verða núna fjölskylda,“ sagði Scheffler í viðtali fyrr á þessu ári.
„Þetta hafa verið afar spennandi mánuðir og við hlökkum til að fá vonandi barnið út við góða heilsu, og að mamman verði heil heilsu, og svo byggjum við á því,“ sagði Scheffler.
Scheffler varð í 10. sæti á Masters-mótinu í fyrra, og fékk að klæðast græna jakkanum með sigri á mótinu fyrir tveimur árum. Besti árangur Burns er 29. sæti. Samkvæmt Golf Digest munu þeir félagar dvelja saman á meðan á mótinu í ár stendur.
Þetta er alls ekki í fyrsta sinn sem að kylfingar keppa á risamóti með það í huga að litla barnið þeirra sé á leiðinni í heiminn. Frægt er þegar Phil Mickelson var með símboða á U.S. Open árið 1999, tilbúinn að rjúka heim ef fæðing væri að hefjast hjá konu hans. Mickelson varð í 2. sæti og varð svo pabbi daginn eftir.
Mastersmótið í golfi verður í beinni á Stöð 2 Sport 4. Útsending frá fyrsta degi hefst klukkan 18.30 í dag en mótið stendur yfir fram á sunnudag.
