Ljós­brot meðal opnunarmynda í Cannes

Kvikmyndin verður sýnd í flokknum Official Selection, Un Certain Regard. Flokkurinn er í aðalkeppni hátíðarinnar og munu aðstandendur myndarinnar ganga rauða dregilinn fyrir heimsfrumsýningu Ljósbrots.

„Það var heill her af hæfileikaríku fólki sem gerði Ljósbrot að veruleika með dugnaði sínum og elju. Ég á ekki til orð til að lýsa því hvað ég er stoltur af okkur að hafa náð þessum áfanga" segir leikstjóri myndarinnar Rúnar Rúnarsson.

Myndin gerist á fallegum vordegi þegar líf Unu snýst á hliðina á svipstundu og upphefst rússibanaferð tilfinninga. Þar sem mörkin milli hláturs og gráturs, fegurðar og sorgar, verða stundum óskýr.

Leikarar eru Elín Hall, Mikael Kaaber, Katla Njálsdóttir, Gunnar Hrafn Kristjánsson, Ágúst Wigum og Baldur Einarsson. Rúnar Rúnarsson skrifar handrit myndarinnar, leikstýrir og framleiðir ásamt Heather Millard.