Arsenal vann kaflaskiptan Norður-Lundúnaslag

Arsenal náði fjögurra stiga forskoti á toppi ensku úrvalsdeildarinnar með sigri á Tottenham, 2-3, í Norður-Lundúnaslagnum í dag. Skytturnur voru 0-3 yfir í hálfleik en Spurs hleypti mikilli spennu í leikinn í seinni hálfleik.

Arsenal er með áttatíu stig á toppi ensku úrvalsdeildarinnar, fjórum stigum á undan Manchester City sem á tvo leiki til góða.

Tottenham byrjaði leikinn í dag af ágætis krafti en lenti undir á 15. mínútu. Pierre-Emile Højbjerg skoraði þá sjálfsmark eftir hornspyrnu Bukayos Saka.

Fimm mínútum síðar skallaði Cristian Romero í stöngina á marki Arsenal. Skömmu síðar hélt Micky van de Ven svo að hann hefði jafnað en markið var dæmt af vegna rangstöðu.

Spurs vildi fá vítaspyrnu á 27. mínútu en fékk ekki og Arsenal geystist í sókn og Saka skoraði með hárnákvæmu skoti í hornið. Þetta var fimmtánda deildarmark hans í vetur.

Á 38. mínútu kom Kai Havertz gestunum svo í 0-3 þegar hann stangaði boltann í netið eftir hornspyrnu Declans Rice. Staðan var 0-3 í hálfleik, Arsenal í vil.

Romero fékk ágætis færi í byrjun seinni hálfleiks en skallaði yfir. Saka var svo hársbreidd frá því að koma Arsenal í 0-4 en Guglielmo Vicario varði skot hans með fætinum.

Á 64. mínútu tókst Romero loks að skora. Hann minnkaði þá muninn í 1-3 eftir að David Raya, markvörður Arsenal, færði honum boltann á silfurfati.

Skömmu fyrir leikslok fékk Spurs víti þegar Declan Rice sparkaði Ben Davies niður. Son Heung-min fór á punktinn, skoraði af öryggi og minnkaði muninn í 2-3. 

Fleiri urðu mörkin hins vegar ekki og Arsenal fagnaði gríðarlega mikilvægum sigri í toppbaráttunni.

Tottenham, sem hefur tapað tveimur leikjum í röð er í 5. sæti deildarinnar með sextíu stig.