Ætlar að sanna að hann sé bestur í Evrópu

Um er að ræða viðburð í blönduðum bardagalistum, þar sem fremsta bardagafólk Íslands mætir öflugum andstæðingum víðs vegar að úr heiminum.

Þetta er annar viðburðurinn sem skipuleggjendur standa fyrir, hinn fyrsti fór fram í Andrews Theater við Ásbrú. Fjórir titilbardagar eru á dagskránni í Úlfarsárdalnum á laugardag.

Einn af þeim sem berst um titil á laugardaginn er Viktor Gunnarsson, bardagakappi sem starfar á frístundaheimili samhliða íþróttinni. Hann mætir Bretanum Caleb Mullin og er spenntur fyrir því að berjast loks hér heima fyrir.

„Síðan ég byrjaði í MMA þá er ég búinn að bíða eftir því að geta keppt á Íslandi fyrir framan Íslendinga. Ég er búinn að keppa alls staðar, alveg frá Evrópu og alla leið til Abú Dabí. Alltaf á flakkinu, en að geta keppt á Íslandi er geggjað“ sagði Viktor í viðtali við Stefán Árna Pálsson.

Hvað þýðir að fara alla leið í MMA?

Eins og sönnum bardagamanni sæmir er Viktor með mikið sjálfstraust og í kynningarmyndbandi fyrir bardagakvöldið á TikTok sagðist hann ætla að sýna hvers vegna hann sé besti bardagakappi Íslands og Evrópu.

„Ég veit að ég sé sá besti á Íslandi í þessu en ég ætla að sýna líka að ég sé bestur í Evrópu. Mitt markmið er bara að fara eins langt og ég get með þetta. Ég elska að æfa, ég elska að keppa, ég elska að vera hluti af íþróttinni og sjá grasrótina blómstra í rauntíma.“

Hvað þýðir alla leið? Er það heimsfrægð og fullt af peningum?

„Nei bara að keppa. Ég elska að keppa og ef peningur og heimsfrægð kemur með því, þá bara kemur það. En að keppa fyrir mig er bara það skemmtilegasta.“

Ekki í dag krakkar

Viktor vinnur á frístundaheimili samhliða bardagaíþróttinni og segir það fara vel saman.

„Það er bara rosalega fínt. Krakkarnir spyrja mig kannski um að sýna einhver spörk, en ég segi: Neiii ekki í dag. Þeim finnst þetta bara gaman“ sagði Viktor brosandi og með glóðarauga.

Fjallað var um bardaga Viktors í Sportpakka Sýnar í gærkvöldi. Innslagið má sjá í spilaranum að ofan.