„Hin raun­veru­legu stólaskipti fóru fram í dag“

Bjarni Benediktsson tók við af Katrínu Jakobsdóttur sem forsætisráðherra 10. apríl síðastliðinn við myndun nýrrar ríkisstjórnar í kjölfar þess að Katrín tilkynnti framboð sitt til embættis forseta Íslands.

Stóll Katrínar, þ.e. skrifstofustóll hennar, virðist þó hafa staldrað lengur við í ráðuneytinu ef marka má Facebook-færslu Bjarna Benediktssonar sem hann birti í dag.

Í færslunni stendur „Hin raunverulegu stólaskipti fóru fram í dag“ og með er mynd af tveimur skrifstofustólum í forsætisráðuneytinu. Stólarnir eru hins vegar ansi ólíkir, annar er bæði töluvert stærri og hærra stilltur en hinn.

„Það er greinilega komin „meiri vigt” í ráðuneytið,“ skrifar Jón Svanberg Hjartarson, framkvæmdastjóri Neyðarlínunnar, við færsluna og uppsker nokkra hláturkalla.