Engin til­viljun að kaffið bragðaðist „eins og skítur“

Vigdís smakkaði ekki kaffið sjálf, en í samtali við fréttastofu greinir hún frá því sem átti sér stað.

Hundur Vígdísar, sem heitir Lambi, var í pössun hjá foreldrunum á dögunum og honum fylgdi hundafóður sem var geymt í plastpoka. Móðir Vigdísar var að koma úr augnaðgerð og sér því illa um þessar mundir. Hún sá kaffibaunir, sem voru í raun hundafóðrið, og bætti þeim við hinar baunirnar.

Vigdís hefur birt mynd af blöndunni á samfélagsmiðlinum Instagram. Athugið að í færslunni eru tvær myndir. Sú fyrri sýnir venjulegar kaffibaunir en sú síðari sýnir kaffibaunir í bland við hundamat.

Í gærmorgun fengu foreldrarnir sér kaffibolla. Sá fyrsti mun hafa verið í lagi, en önnur uppáhellingin var ekki góð. En þá hefur hlutfall hundafóðursins verið orðið hærra en í fyrstu.

„Þetta er eins og skítur,“ á móðirin að hafa sagt þegar hún smakkaði kaffið og faðirinn svarað: „Já ég veit ekkert um það, ég hef ekki smakkað skít.“

Kaffivél foreldrana var komin á síðasta snúning og hún lá undir grun. Foreldrarnir keyptu sér því glænýja vél sem breytti litlu. Kaffið var enn ódrykkjarhæft. Þá uppgötvaðist hundamaturinn.

„Þau eru samt mjög klárt fólk,“ segir Vigdís foreldrum sínum til varnar.

Kaffið er aftur orðið gott að sögn Vigdísar. Foreldrar hennar mæla ekki með því að nota hundafóður til að drýgja kaffi, en sjálf bendir hún á að hundafóður eigi að vera meinholt, uppfullt af fiskipróteini.