„Ef maður er sjálfs­öruggur getur eigin­lega hvað sem er virkað“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Mér finnst skemmtilegast hvað hún getur verið fjölbreytt og er stanslaust að breytast. Ég elska líka að nota tískuna til að tjá mig.

Hver er uppáhalds flíkin þín og af hverju?

Uppáhalds flíkin mín eins og er eru rauðu Kalda skórnir mínir. Ég reyni oft að búa til outfit bara í kringum þá, svo er líka svo kjút þegar rauða táin gægist út fyrir síðar gallabuxur.

Eyðirðu miklum tíma í að velja föt hverju sinni?

Það er mjög misjafnt. Stundum dettur mér eitthvað outfit í hug um leið og ég veit hvað ég er að fara gera. En stundum hendi ég bara einhverju saman og hleyp út (því ég er mjög oft sein).

Stundum sé ég líka fyrir mér outfit þegar leggst á koddan á kvöldin en þá veit maður ekki alveg hvort outfittið verði flott eða ekki. Það er náttúrulega ekki alltaf alveg eins og ég sá það fyrir mér í hausnum. 

Oft fer ég líka hálf klædd til vinkvenna minna og fæ lánaða flík eða fylgihluti til að fullkomna lúkkið.

Hvernig myndirðu lýsa stílnum þínum?

Mér finnst hann svolítið út um allt. Ég tek oft tímabil þar sem mér finnst ég finna fullt af flottum outfittum og fýla í hverju ég er en svo koma tímabil inn á milli sem ég er komin með nóg af öllu sem ég á og á erfitt með að búa til outfit.

Hefur stíllinn þinn breyst mikið í gegnum tíðina og hvernig þá?

Stíllinn minn er stanslaust að breytast og þróast. Ég er eiginlega ennþá að finna minn stíl. Mér finnst til dæmis mjög margt sem ég klæddist bara nýlega ekki endilega málið.

Nýturðu þess að klæða þig upp?

Ég elska að klæða mig upp. Það er bara allt skemmtilegra ef maður er í einhverju sem manni finnst flott og þæginlegt. 

Það hefur alveg áhrif á skapið líka, ef maður er í einhverju sem maður fýlar sig ekki í þá getur kvöldið stundum bara verið ónýtt.

Hvaðan sækirðu innblástur í tískunni?

Ég er mjög mikið á Pinterest. Svo hef ég líka alltaf verið að fá mjög mikinn innblástur frá vinkonum mínum, þær eru allar með mismunandi en geggjaða stíla.

Ertu með einhver boð og bönn þegar það kemur að klæðaburði?

Eiginlega bara þröngar gervi gallabuxur og að bretta skálmarnar á þeim er alveg bannað hjá mér. Annars finnst mér bara mikilvægast að klæða sig eftir sínum líkama og að líða vel í því sem maður klæðist.

Hver er eftirminnilegasta flík sem þú hefur klæðst og af hverju?

Örugglega bara Silvíu Nótt kjóllinn sem Sylvía Lovetank gerði fyrir mig þegar ég keppti í Vælinu, Söngvakeppni Verzló.

Býrðu yfir einhverju góðu ráði þegar það kemur að tísku?

Aukahlutir geta gert undur og um að gera að leyfa sér að prófa sig áfram og prófa allt. Maður veit aldrei hvað gæti verið flott ef maður þorir ekki að prófa. Svo bara klæðast því sem þér líður vel í. 

Ef maður er sjálfsöruggur getur eiginlega hvað sem er virkað og verið flott.