Golf­völlur stað­settur í mikilli náttúru­para­dís

Í sumar ætlum við að kynnast nokkrum af þeim fjölda spennandi golfvalla sem hægt er að finna víða um land og gaman væri að prófa í sumarfríinu en hægt er að leika golf á yfir 60 völlum hér á landi. Golfvöllurinn í Vestmannaeyjum er golfvöllur vikunnar á Vísi.

Golfvöllurinn í Vestmannaeyjum er staðsettur í mikilli náttúruparadís. Fyrri níu holurnar eru spilaðar inn í Herjólfsdal í sérlega fallegu landslagi. Þar má m.a. finna þrjár af elstu golfholum landsins sem enn eru spilaðar og standast þær algjörlega nútímakröfur.

Seinni níu holurnar voru byggðar upp 1993 og eru seinustu holurnar leiknar meðfram sjónum þar sem útsýnið er sérstaklega fallegt til allra átta. Þar er 17. holan einkennishola vallarins þar sem fólk slær yfir Atlantshafið með klettavegg og fljúgandi lunda í baksýn.

Það er mikill metnaður hjá Golfklúbbi Vestmannaeyja að halda vellinum í góðu ásigkomulagi og er hann oftar enn ekki tilbúinn fyrr á vorin heldur enn aðrir vellir á landinu.

Þar sem það er ekki eins mikið spilað á honum og öðrum völlum á höfuðborgarsvæðinu er nánast alltaf hægt að koma og leika hann.

Golfklúbbur Vestmannaeyja er með hátt í 400 meðlimi og öflugt barna- og unglingastarf. Það eru því mikil forréttindi fyrir bæjarfélag eins og Vestmannaeyjar að hafa glæsilegan 18 holu golfvöll í bakgarðinum sem auðvelt er að komast að. Klúbburinn tekur einnig á móti fjölda gesta á ári hverju og er gaman að segja frá því að heimsóknum erlendra ferðamanna hefur fjölgað mikið undanfarin ár. Sá hópur er yfir sig hrifinn að aðstöðunni, umhverfinu og vellinum.

Mörg stór mót eru haldin á vellinum á hverju ár sem mjög vinsæl. Íslandsmótið í golfi hefur til dæmis farið fram sex sinnum á Vestmannaeyjavelli, seinast árið 2022.

Golfklúbbur Vestmannaeyja rekur veitingasölu og býður upp á æfingasvæði og inniaðstöðu þar sem finna má golfherma en nýting þeirra hefur verið mjög góð.

Það er þess virði að koma og leika völlinn í Vestmannaeyjum.