Sögu­leg byrjun Slot

Slot varð í gær fyrsti þjálfari Liverpool til að vinna fyrsta leik sinn í starfi gegn Manchester United frá því að Bob Paisley gerði það í nóvember árið 1975. Síðan þá hafa tíu menn stýrt Liverpool (Kenny Dalglish tvisvar) og enginn afrekað það sem Slot gerði í gær; að vinna United í fyrstu tilraun.

Þá er Slot aðeins þriðji knattspyrnustjórinn í sögu ensku úrvalsdeildarinnar til að vinna fyrstu þrjá leiki sína í deildinni. Hinir tveir eru José Mourinho og Svíinn Sven-Göran Eriksson.

Mourinho vann raunar fyrstu fjóra leiki sína sem stjóri Chelsea haustið 2004 og Eriksson gerði það sama með Manchester City 2007. Slot lék einnig eftir afrek þeirra beggja að halda hreinu í fyrstu þremur leikjunum, auk þess að vinna þá.

Sá síðarnefndi féll frá í síðustu viku eftir baráttu við krabbamein en fékk draum sinn uppfylltan að stýra Liverpool-liði á Anfield áður en hann féll frá. Eriksson stýrði goðsagnaliði Liverpool í góðgerðarleik í vor.

Það fer sannarlega vel af stað hjá Hollendingnum í Liverpool en hann þarf nú að bíða í tæpar tvær vikur eftir næsta verkefni á meðan leikmenn fara til móts við landslið sín.