Finnur Freyr í bann fyrir lætin í Kefla­vík

KKÍ tilkynnti um þessa ákvörðun aga- og úrskurðarnefndar sambandsins í dag. Finni Frey var vísað upp í stúku þegar hann fékk sína aðra tæknivillu snemma leiks.

Í kjölfarið neitaði Finnur Freyr að veita viðtöl, sem og allir leikmenn Vals, eftir leik. Keflavík vann leikinn 98-88.

Samkvæmt því sem fram kom hjá Guðmundi Benediktssyni, sem lýsti leiknum, var ástæðan sú að Finnur var ósáttur við að leikurinn færi fram í Blue-höllinni í Keflavík, en ekki á heimavelli Íslandsmeistaranna eins og venja er.

Finnur hefur nú verið dæmdur í bann fyrir framkomu sína í Reykjanesbæ og verður því ekki á hliðarlínunni þegar Valur hefur leik í Bónus-deildinni annað kvöld. Valsmenn sækja Stjörnuna heim í Garðabæ.