„Eyði­lagður“ yfir sögu­legum titli ítalska ungstirnisins

Horft var á Russell, sem hefur lengi verið á höttunum eftir heimsmeistaratitil, sem aðalökuþór Mercedes liðsins fyrir tímabili en hann þurfti að bíta í það súra að sjá meistaratitilinn enda hjá Antonelli á aðeins hans öðru tímabili í mótaröðinni. Í skugga Ítalans núna eftir að hafa verið svo lengi í skugga sjöfalda heimsmeistarans Lewis Hamilton þegar að þeir voru liðsfélagar hjá Mercedes.

Russell óskaði Antonelli til hamingju skömmu eftir keppni mótaraðarinnar í Mexíkó í gær þar sem að Ítalinn tryggði sér heimsmeistaratitilinn og varð um leið yngsti heimsmeistari sögunnar.

Hann mætti hins vegar ekki í viðtöl eftir keppni og braut þar með reglur Formúlu 1 er varða fjölmiðlaskyldu ökuþóra. Mercedes var því sektað um því sem nemur sex hundruð þúsund íslenskum krónum en Toto Wolff, liðsstjóri Mercedes, tjáði sig um fjarveru Russell í viðtölum.

„Hann er eyðilagður yfir þessu,“ sagði Wolff við fjölmiðla og hefur það tekið á Russell að láta í minni pokann fyrir Antonelli. „Hann sýndi hins vegar mikla íþróttamennsku er hann fór og óskaði Antonelli til hamingju.“

Toto og Russell hafa unnið lengi saman hjá Mercedes.

„Ég hef þekkt hann svo lengi. Þegar ég sá hann eftir keppni hugsaði ég með mér að þetta væri skelfilegt augnablik fyrir hann sem kappakstursökuþór.“

Hann sýnir því skilning að Russell hafi ekki viljað ræða við fjölmiðla eftir keppni. Bretinn kom sér fljótt í burtu af brautarsvæðinu.