B-týpa sem vill verða A en þarf tíma til að „morgna sig“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Mitt sanna morguneðli er að vakna eins seint og mögulegt er þannig að ég rétt næ að hafa mig til og hlaupa út og ekkert má út af bregða til að ég nái á réttum tíma í vinnuna. Klukkan er oftast um 8.15. B manneskja heitir það víst.“

Hvað er það fyrsta sem þú gerir á morgnana?

Batnandi fólki er víst best að lifa, en fyrrnefnd b týpa er síðustu vikur farin að víkja fyrir nýrri týpu sem ég er rétt að kynnast. En hún vaknar nokkrum sinnum í viku fyrir sjö og klæðir sig eins og moldvarpa í myrkrinu í ræktarföt og drífur sig út.

Þá daga sem ég er ekki að reyna við nýju týpuna í ræktinni, er ég hreinlega ekki að gera neitt viturlegt nema að morgna mig, öllum til heilla. 

Mig dauðlangar að segja að ég helli upp á kaffi, hugleiði og eitthvað þannig fínt en ég á enn eftir að þroskast í það.

Ég á þrjú börn sem eru 13, 18 og 22ja svo þau þurfa enga aðstoð lengur. Það er helst þessi í miðjunni sem er b eins og mamma sín sem ég kannski minni á að grípa með sér nesti eða álíka.

Annars eru það bara knúsar og kossar á fjölskyldumeðlimi út í daginn.“

Hvað myndi heimilisfólkið nefna aðspurt um í hverju þú ert a) rosalega góð í, b) vonlaus í?

„a) Ég er heppin að fá að heyra það reglulega frá heimilisfólkinu mínu að ég sé góð í að vera mamma. Það er líklegast hlýjasta hrós sem ég get ímyndað mér.

Annað er að ég sé góð í heildarmyndinni og passa upp á hvað þarf að gera til að hlutir gangi upp og dríf þá áfram. Þau eru til dæmis frekar ánægð í dag með að ég settist niður með þeim síðasta gamlárskvöld og fór yfir hvað við vildum gera saman á þessu ári þar sem börnin eru orðin stór og með sín plön og skyldur, en niðurstaðan var sú að við ákváðum að skoða það að ferðast til Asíu yfir jólin og erum nú á leið til Thailands og mikil spenna komin í hópinn yfir þessari ferð.

b) Ég fæ hins vegar oft að heyra það frá manninum mínum að ég sé vonlaus að versla í matinn. 

Ég viðurkenni það fúslega, ég missi alveg fókus inni í matvörubúð og kem yfirleitt út með nokkrar hálfkláraðar máltíðir og eitthvað sem mér fannst vera í fallegum umbúðum, en veit ekkert hvað ég ætla að nota í.

Það sem allir á heimilinu er hins vegar sammála um að sé minn versti kostur er að ég borða ekki hakk. Ég er nýkomin úr fjögurra daga ferð til Amsterdam og eins og alltaf þegar ég fer eitthvað í burtu er elduð einhvers konar hakk máltíð á hverjum degi í fjarveru minni.“

Í hvaða verkefni ertu að vinna helst í þessa dagana?

„Það eru ýmis spennandi verkefni í gangi einmitt núna, en ég get því miður ekki rætt þau á þessu stigi, en við erum með fjölbreytta flóru af flottum viðskiptavinum sem eru mörg hver að huga að markaðsmálunum sínum þessa dagana.

Haustið er vertíð í auglýsingabransanum. Allt er að fara í gang og gólfið víbrar af stuði niðri á stofu, ég elska þennan tíma. Fólk er tilbúið í vertíðina og hugmyndirnar flæða á milli og allir setja sitt lóð á vogarskálarnar. Þetta er ávanabindandi bransi og ég er ótrúlega þakklát fyrir að fá að vera partur af honum.“

Hvernig skipuleggur þú þig í vinnu?

Það fara miklar planeringar fram í hausnum á mér á hverri stundu og enn sem komið er fer mesta skipulagning fram þar þó mögulega harði diskurinn fari bráðum að fyllast. Annars er ég teiknari að upplagi og alltaf með skissubók við hönd sem geymir hugmyndir, skissur, mikilvæga punkta og glósur í þokkalega skipulögðu kaósi. 

Ég er farin að notast meira við notes í tölvunni, en finn samt að ég set mig meira í stellingar þegar ég skrifa í tölvuna. Hugur og hönd virka enn sem komið er betur fyrir mig.

Á stofunni erum við síðan vel skipulögð í verkumsjónarkerfi sem heitir Wrike og hefur gjörbylt flæði og utanumhaldi verkefnanna á stofunni. Við höfum einnig verið í innleiðingarfasa á því kerfi með stofunni okkar í Osló, SDG\TBWA, því best er auðvitað að samnýta krafta okkar og hæfileika eftir bestu getu. Hins vegar söknum við öll Workplace sem TBWA út í heimi slökkti strax á í sumar þegar það kom í ljós að það væri að hætta. Magnað hvað maður getur saknað eins forrits.“

Hvenær ferðu að sofa á kvöldin?

„Eitt af því sem fjölskyldan mín segir einmitt að ég sé vonlaus í er að fara snemma að sofa.Þannig að B týpan myndi fara að sofa um miðnætti, meðan að þessi nýja í mótun pínir sig um ellefu.“