Ekki trompast við fólk í vinnu eða á fundum

Að vera með stuttan þráð í smá tíma gæti mögulega verið í lagi einstaka sinnum. Svo lengi sem það bitnar ekki á öðrum og við náum tökum á því fljótt og vel.

Enda langar engan að verða uppvís að því að trompast við annað fólk. Það er einfaldlega hegðun sem hvergi á að líðast.

Spurningin er: Hvernig getum við komið í veg fyrir að missa stjórn á skapi okkar? Til dæmis þegar við erum yfirkeyrð af stressi?

Hér eru nokkur góð ráð.

1. Dragðu andann djúpt. Þetta gamla og góða ráð um að telja upp á tíu virkar ótrúlega vel.

2. Núvitund er sögð hjálpa okkur mikið. Að læra að vera í núinu getur verið góð leið til að verða fordómalausari fyrir fólki og aðstæðum. Og um leið, meðvitaðri um það ef skapið er eitthvað að hlaupa með okkur í gönur eða pirringur að læðast að.

3. Lærðu á kveikjurnar: Eða það sem við köllum triggera á ensku. Þetta er kannski eitt mikilvægasta atriðið fyrir okkur að þjálfa okkur í. Að skoða það til hlítar hvers konar aðstæður eða dagar við erum líkleg til að verða pirruð, reið eða missa stjórn á okkur.

Margt spilar hér inn í. Allt frá því að hafa ekki sofið nógu vel, passa ekki upp á jafnvægi í matarræði eða hreyfingu yfir í hvers konar álag eða tímapressa virðist helst fara með okkur.

Um leið og við erum búin að kortleggja hvaða áhrifaþættir eru líklegastir til að hafa þessi neikvæðu áhrif á okkur, getum við búið til plan um hvernig við getum mögulega forðast það að svona augnablik, stundir eða dagar komi upp.

4. Ekkert sjálfs-niðurrif. Þótt markmiðið sé að trompast ekki við annað fólk, er lykilatriðið þó ekkert síður að hætta öllu sjálfs-niðurrifi. Að tala neikvætt til okkar í huganum er eitthvað sem við flest gerum alltof oft. Því betur sem okkur tekst að tala frekar jákvætt til okkar, því betri verður lundin.

5. Að tala við traustan vin. Stundum þurfum við einfaldlega að fá að blása. Eða tjá okkur. Segja hvað okkur finnst, hvernig okkur líður og svo framvegis. Betra er að fá útrás í nokkra mínútna spjalli við traustan vin, en að trompast við vinnufélaga og líða síðan illa á eftir.

6. Leitaðu til fagaðila. Ef þú telur að vandamálið þitt sé einfaldlega þess eðlis að þú ráðir ekki við að snúa hlutunum til betri vegar upp á eigin spýtur, er ekkert að því að leita til fagaðila. Alls kyns góð ráð og verkfæri er hægt að þiggja frá aðila sem hefur fagþekkinguna til og það að fá aðstoð getur því verið allra meina bót.

7. Afsakið hlé. Þetta góða ráð virkar líka ótrúlega vel. Að reyna að fara frá aðstæðum þótt ekki sé nema í nokkrar mínútur. Eða að bíða með að taka samtal eða svara einhverjum þar til síðar í dag eða á morgun. Oft áttum við okkur sjálf betur á aðstæðum ef við bregðum okkur frá í smá stund.

8. Virk hlustun. Flest okkar teljum okkur mun betri hlustendur en við erum í raun. Að þjálfa sig í virkri hlustun getur hjálpað verulega og hægir líka á okkur.

9. Æfum okkur í samkennd. Að skilja fólk, að skilja ólík sjónarmið. Að átta okkur á því að annað fólk er ekki eins og við og öll okkar hugsum ekki eins. Samkennd dregur úr reiðitilfinningu.

10. Að standa með okkur sjálfum. Stundum springum við ekki vegna þess að við erum reið við annað fólk, heldur okkur sjálf. Oft jafnvel vegna þess að við höfum ekki staðið með okkur sjálfum, ekki sagt hvað okkur finnst eða hvernig okkur líður sem síðan leiðir til þess að við á endanum springum. Sem við viljum ekki. Skoðum frekar hvort aðstæður sem þessar komi stundum upp og ef já, þá hvenær eða varðandi hvað?

11. Hláturinn lengir lífið. Oft er gott að brjóta ísinn í þrúgandi andrúmslofti með smá húmor. Að sama skapi þurfum við að fara varlega því húmor getur líka verið meiðandi ef hann er ekki notaður rétt.

12. Raunhæfar væntingar. Þetta á bæði við um væntingar til þín og samstarfsfélaga.

13. Lausnarmiðuð hugsun. Hvaða leiðir eru líklegastar til árangurs aðrar en þær að þú trompist reglulega í vinnunni? Því það er aldrei best.

14. Sjálfsrækt. Að elska okkur sjálf, rækta sjálfið okkar, hlúa vel að okkur sjálfum, hvíla okkur og svo framvegis. Allt eru þetta atriði sem hjálpa okkur að vera létt í lundu og í betra jafnvægi.

15. Lærðu af sjálfum þér. Skoðaðu vel hvað gerist þegar þú trompast. Hvernig líður þér eftirá. Hvernig verða samskiptin við samstarfsfélagana eftir á. Hver verður atburðarrásin? Gott er að kortleggja þetta frá a-ö með það fyrir augum að vilja læra af því sjálf, hvað betur má fara.