Bar fyrir sig að hafa eitt sinn verið í strákabandi

Þetta kemur fram í umfjöllun Daily Mail þar sem rætt er við hótelgestinn sem ber heitið Rebecca. Eins og fram hefur komið lést Payne í fyrradag eftir að hafa fallið undir áhrifum áfengis og fíkniefna fram af svölum þriðju hæðar hótels í argentísku höfuðborginni Buenos Aires. 

Þóttist kyrkja hótelgest

Hann er sagður hafa látið öllum illum látum á hótelherberginu stuttu fyrir andlátið og hringdi starfsfólk á neyðarlínu. Rebecca lýsir því hvernig hún hafi rekist á söngvarann í anddyri hótelsins í fyrradag. Hún gisti á hótelinu vegna brúðkaups vinar síns en þau rákust í þrígang á söngvarann örstuttu áður en hann lést.

„Ég labba inn á hótelið og hann beið þar við lyftuna og það var svo augljóst að hann vildi að einhver þekkti hann,“ segir Rebecca. Hún segir að sér hafi eftir á að hyggja fundist eins og hann hafi verið örvæntingarfullur á einhvern hátt.

Hún segir sig og vini sína hafa ákveðið að láta eins og ekkert væri og gefa Payne næði þrátt fyrir frægð hans. Þegar lyftan mætti á hæðina segir hún að hann hafi skyndilega sagt við þau: „Já, ég er Liam!“ Hann hafi svo grínast með það í lyftunni að hann elskaði gott knús.

Breski miðillinn hefur eftir Rebeccu að hún hafi ákveðið að bíða eftir næstu lyftu. Nokkrir vinir hennar hafi hinsvegar farið upp í sömu lyftu og Payne og spjallað við hann.

„Nokkrar stelpurnar fóru inn með honum og þegar lyftan var farin af stað fór hann að tala um að þær væru Bandaríkjamenn og að hann byggi á West Palm Beach. Hann sagðist þekkja Bandaríkjamenn og vita að þeir væru klikkaðir, hættulegir.“

Þá segir Rebecca að Payne hafi gripið í eina vinkonu sína, sem hann hafi talið að hann hafi átt í einhverskonar sambandi við og þóst kyrkja hana. „Hann greip ekki fast í hana en hinum fannst þetta afar furðulegt.“

Rústaði tölvunni í anddyrinu

Þá lýsir Rebecca því við breska miðilinn að tíu mínútum síðar þegar hún hafi farið aftur niður í anddyri hótelsins hafi Payne verið þangað mættur með fartölvuna sína. Hún segist hafa tekið eftir því að hann væri með fartölvuna sína á aðgengisstillingum fyrir blinda, þannig að allar skipanir voru sagðar upp hátt.

„Mér fannst hann hafa þetta svona til að vekja á sér athygli. Svo opnaði hann tölvupóstinn sinn og virtist sjá einn sem fékk mikið á hann. Allt í einu lokaði hann tölvuna og kallaði hátt: „Fari þetta fjandans til,“ áður en hann smassaði tölvunni í gólfið.“

Rebecca segir að gestum hótelsins hafi þótt þetta afar óþægilegar aðstæður. Hótelið hafi verið lúxushótel og hegðunin þótti því enn furðulegri en ella. Hún segir að hún hafi að lokum ákveðið að ræða við söngvarann og spurt hann hvort það væri í lagi með hann.

„Ég var einu sinni í strákabandi. Þess vegna er ég svona tjónaður,“ segir Rebecca að Payne hafi sagt við sig. Hann hafi því næst bölvað síendurtekið og tekið tölvuna með sér inn í lyftuna. Hún segir fylgdarmann Payne því næst hafa beðið hana afsökunar á hegðun hans. Hann hafi sagt henni að hann yrði stundum „einum of skakkur.“

Mætti í þriðja skiptið í anddyrið

„Ég velti þarna fyrir mér hvað þetta fólk hans væri að gera til þess að hjálpa honum en kannski höfðu þau reynt það en það ekki tekist. Starfsfólk hótelsins var afar brugðið og fylgdist mjög náið með honum. Ég sá líka að eitt þeirra var í símanum, hljóta að hafa verið að tala við öryggisgæslu eða lögreglu.“

Sjálf segist Rebecca aldrei hafa tekið kókaín. Henni hafi sýnst sem svo að Payne hafi hegðað sér nákvæmlega eins og einhver sem væri á því efni. Hún segir að hann hafi svo mætt aftur í anddyr hótelsins í þriðja skiptið.

„Hann gekk inn aftur og missteig sig og datt beint á andlitið. Þá mætti starfsfólkið og hjálpaði honum aftur inn í lyftuna. Það var stuttu eftir þetta sem lögreglan mætti og ég hélt þau ætluðu bara að henda honum út en þá fór starfsfólkið á fullt og við áttuðum okkur á alvarleika þess sem hafði gerst.“