Hræði­leg mis­tök hjá Elíasi í Evrópu­deildinni í gær­kvöldi

Elías spilar með danska félaginu Midtjylland en bæði hann og liðið hafa gert mjög góða hluti í Evrópukeppninni í vetur.

Fyrir leikinn í gær hafði Midtjylland ekki tapað leik og náð í sjö stig af níu mögulegum.

Liðið tapaði hins vegar 2-0 á móti rúmenska félaginu FCSB í Rúmeníu í gær.

Midtjylland lenti undir í fyrri hálfleiknum eftir að aukaspyrna fór af varnarmanni og í markið án þess að Elías kæmi vörnum við.

Ástæðan fyrir væntanlega svefnlítilli nótt voru aftur á móti upphafssekúndur seinni hálfleiksins.

Markið kom eftir aðeins átta sekúndur þegar Daniel Bîrligea komst inn í sendingu frá Elíasi. Bîrligea náði boltanum og skoraði í tómt markið.

Elías var þarna kominn langt út úr markinu og gat lítið gert eftir þessa slöku sendingu sína.

Atvikið má sjá þegar um mínúta er liðin af myndskeiðinu að ofan.