Sósustormur í Bret­landi rakinn til verk­falls hjá Bakka­vör

Guardian, Daily Mail og Mirror hafa öll síðustu daga fjallað um verkfallið hjá Bakkavör út frá þeim skorti sem það er að valda á súpum og vinsælli ídýfu. Sérstakur fókus hefur verið á gríska fiskiídýfu sem er mjög vinsæl meðal Breta og kallast Taramasalata en hún er nú algjörlega ófáanleg í stærstu verslunarkeðjunum Tesco, Sainsbury's, Waitrose og Marks & Spencer.

Financial Times hefur eftir heimildum sínum að slæm birgðastaða á taramasalata sé tilkomin vegna verkfallsaðgerða starfsfólsk í Spalding sem krefst hærri launa. Forsvarsfólk verkalýðsfélagsins Unite the Union kom til Íslands á dögunum og stóð fyrir herferð gegn íslenskum meirihlutaeigendum fyrirtækisins.

Þeir Lýður og Ágúst Guðmundssynir og Sigurður Valtýsson fara með meirihluta í félaginu, sem nú stendur í kjaradeilu við starfsmenn í verksmiðju í Spalding á Englandi. Gengi á bréfum í félaginu hefur fallið um 22 prósent undanfarinn mánuð sem þýðir að eign íslensku eigendanna í félaginu hefur minnkað um á annan tug milljarða íslenskra króna. Virði Bakkavarar er 750 millónir punda eða sem svarar til um 130 milljarða íslenskra króna.

Málið hefur ekki aðeins verið skoðað í breskum vefmiðlum heldur einnig í sjónvarpi og þá á léttari nótum. Af þeim má ráða að eiginkonur karlkyns fréttamanna séu sólgnar í dýfuna og mennirnir í mestu vandræðum að hafa uppi á þeim í verslunum.

Að neðan má sjá brot úr tveimur slíkum þáttum, annars vegar í Good morning Britain á ITV og sjónvarpsfréttum BBC News, þar sem verkalýðshreyfingin hefur í herferð sinni birt brot úr á X, áður Twitter.

Dailymail tínir til ummæli aðdáenda dýfunnar á X-inu.

„Mamma mín hefur verið að tuða yfir skortinum á taramasalata í nokkrar vikur. Hún er farin að kaupa beint af veitingastöðum,“ segir einn.

„Ég veit að þetta er algjört fyrsta heims vandamál en er skortur um allt land á taramasalata? Mig langaði svo í sósuna um helgina en fann hvergi. Ekki í Tesco, Waitrose, Sainsbury, Marks and Spencer. Hvað er í gangi?“

Bresku miðlarnir eru þekktir fyrir orðaleiki og hnyttni í fyrirsagnasmíði. Guardian býður upp á „dip in supply“ sem mætti þýða sem “dýfu í framboði“.

Bakkavör hefur sagt að verkfallsaðgerðir muni ekki hafa áhrif á framleiðslukeðju fyrirtækisins til lengri tíma. Þá séu jólavörur framleiddar í öðrum verksmiðjum en þeirri í Spalding þar sem verkfallsaðgerðir standa yfir.

Verkalýðshreyfingin hefur sagt að 700 starfsmenn af þeim 1400 sem vinna í verksmiðjunni í Spalding séu í verkfalli. Bakkavör segir hins vegar að 450 starfsmenn mæti ekki til vinnu. Krafa starfsfólksins er hærri laun en Bakkavör segist hafa boðið lægst launuðu starfsmönnum sínum 7,8 prósenta launahækkun og öðrum 6,4 prósenta hækkun. Það sé vel yfir breskum framfærsluviðmiðum og verðbólgu í Bretlandi, sem mælist 1,7 prósent. Laun hjá félaginu síðustu þrjú ár hafi þá hækkað umfram neysluvísitölu.

Þá hafi samningar náðst við 13.500 starfsmenn í tuttugu öðrum verksmiðjum en í Spalding, þar sem hluti starfsfólks hefur verið í verkfalli síðan seint í september.

„Þið hafið efni á þessari kauphækkun, borgið hana núna,“ sagði Sam Luczynski, skipuleggjandi hjá Unite the Union, við fréttastofu á dögunum.