Vaxtalækkun gleði­tíðindi en vextir enn­þá „allt of háir“

Ákvörðun Seðlabankans um áframhaldandi vaxtalækkunarferli gladdi að vonum marga í morgun en Bjarni Benediktsson formaður Sjálfstæðisflokksins er þar engin undantekning og að nú geti þjóðin farið bjartsýn inn í komandi mánuði.

„Það er ekki síður ánægjulegt að sjá að Seðlabankinn er að taka verðbólguvæntingarnar fram á við niður um alveg heilt prósentustig þannig að Seðlabankinn er að segja að glíman við verðbólguna gengur betur en við sáum fyrir fyrir nokkrum misserum síðan, það er mjög jákvætt, síðan birti Seðlabankinn einnig í dag samanburð á milli Íslands og annarra ríkja sem setur ísland í algjöran sérflokk þegar kemur að því að hafa endurheimt framleiðslugetuna eftir heimsfaraldur þegar kemur að því að skapa störf.“

Bjarni segir að nú sé uppskera eftir að hafa rekið aðhaldssama ríkisfjármálastefnu frá 2022.

„Það tók tíma fyrir vextina að vinna á verðbólguna en ábyrgir kjarasamningar fyrr á þessu ári eru núna að fara að skila sér þannig að við erum á vissan hátt komin á beinu brautina en það þarf að klára verkefnið og ég er að leggja áherslu á það núna fyrir þessar kosningar að menn fari ekki að rífa í stýrið og breyta um stefnu með stórauknum ríkisútgjöldum, nýjum sköttum og gæla við að fara í Evrópusambandið til að vinna þetta verkefni til enda, þess þarf ekki, við þurfum bara að halda haus, sýna aga og klára þetta mál.“

Segir festu hafa skort í ríkisfjármálum

Kristrún Frostadóttir, formaður Samfylkingarinnar segir vaxtalækkun gleðitíðindi en vextir séu þó enn allt of háir.

„Það hefur auðvitað skort festu í ríkisfjármálunum sem hefur verið mjög dýru verði keypt fyrir heimilin. Það er kannski ekki furða að verðbólgan sé byrjuð að hjaðna og byrjuð að hægja verulega á sér eins og húsbyggingar og annað vegna þess að það er búið að vera mjög hátt vaxtastig í mjög langan tíma. Ríkisstjórnin hefur í rauninni tekið þá ákvörðun að brjóta verðbólguna á bakinu á venjulegu vinnandi fólki - millistéttinni í landinu - sem er núna búin að greiða fjörutíu milljarða viðbótar í vaxtakostnað undanfarið ár út af þessari stefnu.“

Kristrún kveðst mjög meðvituð um mikilvægi þess ríkið verði ekki rekið áfram á yfirdrætti, eins og hún kemst að orði.

„Við munum ekki fara af stað með verkefni sem eykur halla ríkissjóðs umfram það sem núna er vegna þess að við vitum líka að stærsta einstaka kjarabótin fyrir heimilin og fyrirtækin í landinu verður áframhaldandi lækkun vaxta þannig að það verður að vera ábyrgð í öllum kosningaloforðum og við höfum stillt upp skýru plani í því samhengi og ætlum okkur að negla niður vextina á næsta kjörtímabili,“ segir Kristrún.