Festa kaup á hug­búnaðar­fyrir­tækinu Evolv

Í tilkynningu segir að Evolv hafi þróað og innleitt lausnir sem nýti stafrænt vinnuafl til að auka skilvirkni og gæði og hafi frá stofnun þess árið 2020 þjónustað fjölda fyrirtækja og stofnana, þvert á starfssvið.

Haft er eftir Hildi Einarsdóttur, forstjóra Advania, að kaupin marki mikilvægan áfanga í áframhaldandi framsækni Advania og það sé mikið gleðiefni að fá jafnöflugt félag og Evolv til liðs við Advania. „Evolv hefur skapað sér trausta stöðu á sínu sérsviði sem byggir á öflugri nýsköpun og fyrsta flokks þjónustuveitingu,“ segir Hildur. 

Með kaupunum er Advania sagt stíga mikilvægt skref í þeirri stefnu að vera öflugur samstarfsaðili á sviði sjálfvirknivæðingar á evrópskum markaði.

Hjá Evolv starf um þrjátíu sérfræðingar með bakgrunn í þróun og víðtæka reynslu af innleiðingu lausna og stuðningi við starfsfólk við að hámarka ávinning sjálfvirknivæðingar. Sérfræðingar Evolv verða eftir samrunann hluti af teymi sex hundruð sérfræðinga Advania á Íslandi. Kaup Advania á Evolv eru háð skilyrðum um samþykki Samkeppniseftirlitsins.

Í tilkynningunni er enn fremur haft eftir Eyþóri Loga Þorsteinssyni, stofnanda Evolv, að þau séu gríðarlega spennt fyrir því að ganga til liðs við Advania. „Frá fyrsta degi hefur metnaður okkar hjá Evolv verið að leiða þróun snjallrar sjálfvirknivæðingar og hjálpa fyrirtækjum að nýta til fulls möguleika sjálfvirkra lausna. Fram undan eru stór tækifæri í heimi sjálfvirknivæðingar,“ segir Eyþór Logi.

Þá segir Sigurður Davíð Stefánsson, stofnandi Evolv, að þetta sé mikil viðurkenning á þeirri vinnu sem teymið hafi lagt í uppbyggingu félagsins og þeim árangri sem náðst hafi á undanförnum árum. „Viðskiptavinir okkar munu njóta góðs af breiðari tæknilegri getu, auknum stuðningi og aðgengi að sterku samstarfsneti, meðal annars á sviði kjarnakerfa, gervigreindar, skýjalausna og gagnavinnslu. Með þessu leggjum við traustan grunn að næsta kafla og opnum á ný tækifæri fyrir bæði viðskiptavini og starfsfólk.“