Segir Mið­flokksmönnum að „gráta minna og brosa meira“

Maðurinn sem um ræðir er Tómas Ellert Tómasson, fyrrverandi bæjarfulltrúi Miðflokksins í Árborg. Hann sóttist eftir oddvitasæti flokksins í Suðurkjördæmi í síðasta mánuði en hætti við nokkrum dögum síðar af persónulegum ástæðum. Hann styður nú Höllu Hrund Logadóttur, fyrrverandi orkumálastjóra og oddvita Framsóknar í kjördæminu.

Í gærkvöldi birtist færsla á Facebook-síðu Miðflokksins í Suðurkjördæmi þar sem deilt var opnu bréfi Kára Stefánssonar til Snorra Mássonar, oddvita Miðflokksins í Reykjavíkurkjördæmi suður. Í bréfinu sagði Kári að Snorri þyrfti að sætta sig við að vera orðinn frambjóðandi Miðflokksins, þótt honum kynni að mislíka stefnan.

Síðar um kvöldið birtist önnur færsla þar sem kom fram að Tómas Ellert hafi verið að verki, tæpum fjórum vikum eftir að hafa sagt sig úr flokknum og lýst yfir stuðningi við Höllu. Miðflokkurinn liti málið alvarlegum augum. Þar undir í athugasemdakerfinu svaraði Tómas fyrrverandi félögum sínum fullum hálsi og gekkst við því að hafa birt færsluna.

Viðbrögðin jákvæð

Í samtali við Vísi segist Tómas hafa skýrt ágætlega fyrir sínum gömlu félögum hvers vegna hann brá á þetta ráð. 

„Það fer allt fram hjá þessa dagana, kallgreyjunum,“ segir Tómas Ellert. Hann hafi fengið mikil og jákvæð viðbrögð við uppátækinu, sem hafi verið ætlað að vekja athygli Miðflokksmanna á grein Kára.

 „Ég var bara að láta þá vita af þessu opna bréfi Kára, svo þeir myndu nú svara því. Eða allavega svo það færi ekki fram hjá þeim, eins og flest þessa dagana.“

Segist réttur eigandi síðunnar

Tómas gefur lítið fyrir gagnrýni á athæfið, sem Miðflokksmenn sögðust líta alvarlegum augum.

„Ég skil það nú bara eiginlega alls ekki. Í raun og veru á ég þessa síðu. Ég setti hana upp á sínum tíma, þeir eru bara með hana í láni frá mér. Kannski er spurning um að óska eftir því að þeir bara skili síðunni,“ segir Tómas. 

Hann sé að skoða það með lögmanni sínum að óska eftir einmitt því, að síðunni verði skilað í hans hendur.

„Ég stofnaði þessa síðu og er rétthafi hennar, myndi ég halda.“

„Alltaf fórnarlömbin“

Finnst þér óeðlilegt að menn bregðist ókvæða við þegar þetta er staðan, að þú sért hættur í flokknum og styðjir frambjóðanda annars flokks í kjördæminu?

„Nei nei, þessi viðbrögð frá þeim komu mér ekkert á óvart. Þeir eru alltaf svo mikil fórnarlömb í öllu, þegar þeir lenda í einhverju eða gera einhverja skandala. Þeir eru alltaf fórnarlömbin,“ segir Tómas Ellert.

Sjá einnig: „Girtu þig nú í brók og horfstu í augu við sjálfan þig“

Hann segir þó enga kergju í sér gagnvart hans gömlu samflokksmönnum.

Ósáttur með fjarveru við fyrstu skóflustungu

„Þeir verða að fara að vakna þessir drengir og átta sig á því hvað er að gerast í kringum þá. Það er eins og þeir hafi ekki hugmynd um það. Það er risaskandall að þeir hafi ekki einu sinni verið með menn hérna við skóflustunguna á nýju Selfossbrúnni. Þetta er ein stærsta og merkasta framkvæmd sem verður unnin hér á Suðurlandi næstu árin. Mér finnst það bara grafalvarlegt mál að þeir skuli ekki hafa getað komið og samglaðst fólki með þá framkvæmd,“ segir Tómas Ellert.

Fyrsta skóflustungan að nýrri Ölfusárbrú var tekin á mánudaginn í síðustu viku en Miðflokksmenn á þingi hafa grínast með það á samfélagsmiðlum að ekki sé búið að hanna brúna en samt hafi fyrsta skóflustungan þegar verið tekin. 

„Heil 281 króna“

Að dómi Tómasar þurfa Miðflokksmenn að líta í eigin barm.

„Og hætta að spila sig sem einhver fórnarlömb í öllu. Gráta minna og brosa meira.“

Nú hefur aðgangi Tómasar að síðunni verið lokað. Hann segist hafa kostað til fleiri hundruðum þúsunda í auglýsingar á síðunni frá því hún var stofnuð í október 2017.

„Kannski maður sendi þeim bara reikninginn fyrir þessum auglýsingum ef þeir vilja ekki skila síðunni.“

Þessi umrædda færsla var kostuð. Gerðir þú það úr eigin vasa?

„Þetta er allt úr mínum eigin vasa. Þetta líka, heil 281 króna sem þetta kostaði mig,“ segir Tómas Ellert að lokum.