„Þessi að­gerð lukkaðist vel“

Blaðamaður ísraelska fjölmiðilsins Ynetnews ræddi við Giora Eiland, fyrrverandi formann öryggisráðs Ísraelsríkis sem í dag starfar sem ráðgjafi fyrir Black Cube.

Greint hefur verið frá því að huldumaður, sem sagðist vera svissneskur fjárfestir, á vegum Black Cube hafi átt í samskiptum við Gunnar Bergmann. 

Undirbúningur ísraelska fyrirtækisins hafi varað um mánaðaskeið, en huldumaðurinn hafi sagst hafa áhuga á að fjárfesta í fasteignum hér á landi. Hann hafi síðan átt fund með Gunnari á Edition-hótelinu í Reykjavík og tekið samskipti þeirra upp.

Í upptöku af samskiptunum heyrist Gunnar tala um hvernig Jón faðir hans, fulltrúi ráðherra í matvælaráðuneytinu, ætli að veita leyfi til hvalveiða.

Töldu Gunnar líklegan til að tala af sér

Íslensku og erlendu náttúruverndarsamtökin hafi sett sig í samband við Black Cube til að rannsaka meinta spillingu sem tengdist íslenskum stjórnmálum og viðskiptalífi.

„Og það sem við gerðum sem fyrirtæki er það sama og í öllum verkefnum,“ er haft eftir Eiland sem segir Black Cube hafa ráðist í umfangsmikla rannsóknarvinnu í leit að mögulegri glufu.

„Þegar við gerum það vekjum við eitt af skuggafyrirtækjum okkar (e. cover companies) og sendum fulltrúa á vettvang sem kann tungumál viðfangsins og kann að framkalla upplýsingarnar sem viðfangið býr yfir. Í þessu tilfelli vissum við að það væri Gunnar, sem er sjálfsöruggur og á það til að slá um sig,“ segir Eiland.

Rétt er að taka fram að miðað við upptökurnar á Edition-hótelinu fóru samskipti Gunnars og huldumannsins fram á ensku.

Engin muni ræða hvalveiðileyfi í kjölfar aðgerðarinnar

Í umfjöllun Ynetnews er fullyrt að aðgerð Black Cube hafi verið gríðarlega árangursrík. Upplýsingarnar sem fram komu hafi valdið miklu fjaðrafoki í íslenskum fjölmiðlum og frestað umræðu um hvalveiðileyfi.

„Það er góð tilfinning,“ segir Eiland.

„Þessi aðgerð lukkaðist vel og enginn á Íslandi mun ræða um hvalveiðileyfi um hríð.“

Þess má geta að í kjölfar þess að málið kom upp hefur nokkur umræða um útgáfu hvalveiðileyfis farið fram. Fjögur fyrirtæki hafa sótt um leyfi til að stunda hvalveiðar en ákvörðun ráðuneytisins liggur enn ekki fyrir.

Íslenska málið forvitnilegt

Black Cube er hvað þekktast fyrir að hafa unnið fyrir bandaríska kvikmyndaframleiðandann Harvey Weinstein eftir að fjöldi kvenna sakaði hann um kynferðisofbeldi. Hann nýtti þjónustu fyrirtækisins til að reyna að koma í veg fyrir að New York Times myndi fjalla um mál hans. Það bar þó ekki árangur.

Giora segir að eftir mál Weinsteins kom upp hafi Black Cube endurskipulagt það hvernig ákveðið sé hvaða mál fyrirtækið ákveði að taka fyrir. 

Málin séu litakóðuð. Grænn þýðir að það sé í lagi að taka að sér verkefnið. Rauður þýðir að það sé ekki í lagi. Gulur þýðir að málið sé viðkvæmt en fjárhagslega hagkvæmt.

Umræddur Giora situr í sex manna nefnd sem ákvarðar hvaða mál falla undir hvaða lit.

Þá segir hann að á hverju ári taki fyrirtækið að sér eitt mál í „góðgerðarskyni“. Málið á Íslandi hafi ekki verið það mál, en fyrirtækinu hafi þótt málið sérstaklega forvitnilegt.

Fréttin hefur verið uppfærð.