Skemmti­leg tískuslys og eftir­minni­leg jólaföt

Guðmundur Birkir Pálmason, Gummi Kíró:

„Ég ætla þessi jólin að vera í þægilegu svörtu setti, buxum og skyrtu, sem ég hef stundum notað ef ég vill vera fínn og pínu glamorous en er á sama sjúklega þægilegt. 

Það er hægt að hafa skyrtuna yfir buxurnar sem frekar afslappaðar víbrur en líka girtar ofan í buxurnar með fínu belti eins og ég mun hafa það þessi jólin.

Ég man eftir þeim tíma sem ég var oft í þriggja laga (3 piece) jakkafötum og úr ullarblöndu. 

Þá var mér bæði allt of heitt og einnig sniðin alltof þröng þannig að ég var að drepast úr hita og buxurnar skárust inn í magan á mér eftir matinn.

Ég held að margir kannist við það að geta varla beðið eftir því henda sér úr fínu fötunum og beint í náttfötin eftir að hafa opna alla pakkana aðfangadagskvöld.

Í dag klæði ég mig aðeins í eitthvað sem er þægilegt.“

Guðný Björk Halldórsdóttir, DJ Guðný:

„Jólafötin voru heilagt fyrirbæri og mikið mál þegar maður var yngri. Þrátt fyrir að jólaföt síðustu ára hafi verið glæsilegri þá situr ekkert jafn fast í minni eins og þau sem maður valdi í samvinnu við mömmu, röltandi milli búða, mátandi allt mögulegt og reyna að ná sáttum.

Eftirminnilegustu jólafötin mín eru þó úr fimmta bekk, þegar ég fékk í fyrsta sinn algjört listrænt frelsi til að velja þau sjálf. Mér fannst ég svo svakalega flott og „edgy“ í silfurlituðu pilsi úr Outfitters í Kringlunni sem ég óska þess að ég gæti ennþá passað í, svörtum kvartermabol með rúllukraga og fjólubláu bindi úr strákadeildinni í Hagkaup. 

Punkturinn yfir i-ið var svo hárgreiðslan; svakalegur toppur en restin af hárinu bundin í tagl. Þetta var alveg hrikalegt jólalúkk en ég er þakklát fyrir að hafa fengið að velja það sjálf. Á þeim tíma fannst mér ég flottust í heimi og núna hef ég eitthvað til að hlæja að þegar ég rifja þetta upp.

Ég má líka til með að minnast á jólakjólinn úr Debenhams í fjórða bekk. Hann var ein af fyrstu flíkunum sem opnuðu augu mín fyrir því hversu mikilvæg góð snið eru. Kjóllinn var svo ótrúlega fallegur í sniðinu og passaði svo fullkomlega að ég fékk engan frið frá frænkum í jólaboðunum.

Í ár ætla ég að klæðast þægilegum fötum. Fyrst skelli ég mér í sett sem ég saumaði sjálf og svo er alltaf best að skella sér í nýju jólanáttfötin. Hátíðarhöldin hafa breyst með árunum og nú er ég farin að leggja meiri vinnu í áramótafötin en jólafötin.“

Chanel Björk, fjölmiðlakona:

„Eftirminnilegustu fötin held ég að séu örugglega jólaföt sem ég var í sem unglingur en um sumarið þá förum við fjölskyldan til Ítalíu og ég keypti blússu frá Prada á einhverjum hönnunar markaði (e. Designer outlet).

Ég var örugglega bara fjórtán ára en þetta var mjög eftirminnilegt því þetta var fyrsta hátísku flíkin mín. Þetta var hvít blússa með smá riffluðu hálsmáli. Ég var í henni við svartar þröngar gallabuxur.

Í ár verð ég líklegast í rauðum síðum kjól frá uppáhalds merkinu mínu Line by K. Ég á í raun ekkert rautt í fataskápnum þannig þetta er smá áhætta (er meira fyrir nútral liti), en ég ákvað að breyta aðeins til í ár og krossa fingur að þetta fari mér.

Ég er líka mjög hrifin af því að leika sér með litríkar sokkabuxur og blanda saman ólíkum litum eða mynstrum.“

Erna Hrund, sölustjóri Collab: 

„Eftirminnilegustu jólafötin er rauður kjóll sem amma mín og nafna saumaði handa mér. Þetta er kjóllinn sem fer aldrei úr huga mér þegar ég hugsa til baka, ætli þetta hafi ekki verið jólin sem ég var fimm ára. 

Amma var áskrifandi af dönsku blöðunum eins og hún kallaði þau, Alt for damene og þess háttar tímarit sem komu til hennar í hverjum mánuði full af alls konar sniðum af klæðum sem hún saumaði svo af hennar einstöku fagmennsku. Yfirleitt heklaði hún svo fallegan kraga við kjólana.

Í ár hefur kjóllinn ekki enn verið valinn, það er yfirleitt það síðasta því ég er það heppin að besta vinkona mín er fatahönnuður og á eina fallegustu verslunina í landinu svo ég geri mér ferð þangað á Þorláksmessu, við skiptumst á jólagjöfum og ég kaupi mér jólakjólinn. 

Í ár kemur þessi rauði sem heitir Habanera sterklega til greina svo er hann líka eldrauður eins og sá sem ég klæddist fyrir þrjátíu árum síðan svo það ætti vel við.“