Play telur ríkið geta sparað sér tugi milljóna

Kristrún Frostadóttir forsætisráðherra gerði það einu af sínum fyrstu verkefnum í embætti forsætisráðherra að óska eftir sparnaðarráðum frá þjóðinni. Þjóðin hefur ekki setið á sér og tillögurnar eru nú orðnar 2772. 

Ýmissa grasa kennir í tillögunum. Nokkuð algengt er að fólk leggi til að ÁTVR verði lögð niður og ýmsar stofnanir sameinaðar. Þá leggur einn til að Ísland segi sig úr NATO og leigi bandalaginu aðstöðu hér á landi fyrir litla eitt hundrað milljarða á ári.

Ríkið kaupi alltaf ódýrasta miðann

Flugfélagið Play hefur nú skilað inn tvíþættri tillögu að aukinni ráðdeild í ríkisrekstri. Fyrri liðurinn er einfaldur, að ríkisstofnanir kaupi alltaf ódýrasta flugmiðann fyrir starfsmenn sem ferðast til og frá Íslandi vegna vinnu.

Síðari liðurinn snýr að vildarpunktafríðindum opinberra starfsmanna, sem hafa áður komið til umræðu.

Augljósir hagsmunir fyrir hendi

Í tillögu Play segir að Icelandair bjóði viðskiptavinum sínum upp á að safna vildarpunktum þegar ferðir eru bókaðar með flugfélaginu. Play bjóði ekki upp á sömu þjónustu en bjóði aftur á móti hagstæðara verð fyrir sömu þjónustu. Þegar ríkið kaupir flug fyrir opinbera starfsmenn með Icelandair fái starfsmennirnir persónulega vildarpunkta til einkanota.

„Þannig hafa opinberir starfsmenn mikla hagsmuni af því að ferðin sé frekar bókuð með Icelandair en Play. Þá má hins vegar fullyrða að flug með PLAY sé í langflestum tilvikum ódýrar en Icelandair. Margar aðrar ástæður geta legið að baki því að velja eitt flugfélag umfram önnur, t.d. brottfarartími, en persónuleg söfnun starfsmanna á vildarpunktum er óeðlilegur hvati og leiðir til þess að ríkið greiðir mun hærri upphæð fyrir flugferðir opinberra starfsmanna en þörf krefur.“

Alþingi keypti fjörutíu sinnum meira af Icelandair en Play

Skýrt dæmi um að ríkisstarfsmenn velji dýrari kostinn séu flugferðir Alþingismanna árið 2023. Samkvæmt frétt Morgunblaðsins hafi Alþingi keypt flugmiða af Icelandair fyrir 20,9 milljónir króna það árið en einungis fyrir 500 þúsund krónur af Play. Munurinn þar á milli er rúmlega fjörutíufaldur. 

Ekki sé hægt að rökstyðja að verð, áfangastaðir eða flugtími Play réttlæti slíkan mun. Play fljúgi til þeirra borga í Evrópu sem Alþingismenn ferðast mest til. Brottfarartímar Play til Evrópu séu að jafnaði um klukkustund fyrr á morgnanna, sem ætti ekki að réttlæta dýrara val á flugsæti, sérstaklega ekki þegar farið er með fé skattborgara. 

„Farmiðakaup Alþingismanna eru aðeins brot af heildarinnkaupum ríkisins á flugmiðum. Play telur ríkið geta sparað að minnsta kosti tugi milljóna á ári með því að hætta að greiða einkaáskrift opinberra starfsmanna að óþarflega dýru vildarkerfi.“